“Dixwazim li Kurdistana Azad bibim sefîrê Çînê”

“Dixwazim li Kurdistana Azad bibim sefîrê Çînê”
Ma Sî yê Çînî li Bîşkekê bû dildarê kurdî!
Salihê Kevirbirî / Bîşkek

Ma Sî ciwanekî 32 salî ye. Ew bi nîjada xwe Çînî ye. Ji Herêma Sîncanê ye. Ev salek e ku ji bo xwendina masterê li Bîşkeka Kirgizîstanê ye. Ma Sî dildarekî çand, huner, edebiyat, tarîx û muzîka kurdî ye. Di van demên dawî de bala wî li ser geşedanên Kurdistanê ye. Bi pêşveçûnên kurdan kêfxweş dibe. Lê rewşa heyî ya Rojavayê Kurdistanê dilê wî xemgîn dike.
Ma Sî dema li Çînê ye, kêm jî be ji rojname, radyo û televizyonan ji kurdan haydar dibe. Lê li gorî saloxdayîna wî, her dem kurdan bi nûçeyên şer û pevçûn û bi peyvên terorîzmê nas kiriye. Hatina Bîşkekê dike ku agahdarî û nêrînên wî yên li ser kurdan ji serî heta binî biguherin.
Li Çînê Ma Sî, li Bîşkekê Şervan!
Ma Sî piştî hatina Bîşkekê, li zanîngehê rastî şagirtên kurd tê. Yekser bi wan re dibe dost û hogir. Şoreş Abî ku wekî ”Şoreşê Colemêrgî” tê naskirin, yek ji heval û hezkiriyekî wî yê sereke ye. Herdem ew ligel hev in û tevî şagirtên din ên kurd ji bo geşedana çand û hunera kurdî dixebitin. Hezkirina kurdî û kurdan kiriye ku Ma Sî navê xwe bike kurdî. Hemû hevalên wî yên dibistanê, bi navê ”Şervan” gazî wî dikin.
Şervan, ango Ma Sî bi kurdî diaxive, li tembûrê dixe û stranên şoreşgerî yên kurdî bêqisûr dibêje. Gava em dixwazin bi çend hevokan behsa kurdan bike, bi kêfxweşî qebûl dike:
“Ez ji kurdan hez dikim. Dixwazim kurdiya min baştir bibe û xebatê ji bo kurdan bikim. Berê qet haya min ji kurdan tunebû. Lê piştî hatim Bîşkekê, hevnasiya min bi şagirtên ji 10 neteweyan re çêbû. Lê herî zêde dilê min li hevalên kurd geş bû.”
Stran û govendên kurdî ji bo Ma Sî gelek girîng in. Li gorî gotina wî awazên kurdî hest û ramanên wî geş dikin û strangotin û guhdarîkirina kurdî heyecaneke mezin pê daye çêkirin. Ma Sî sedemeke din a ji bo hezkirina kurdan jî bi van hevokan tîne ziman:
“Helbet stran û govendên kurdî ji bo min zehf xweş in; lê bindestiya kurdan, zor û zehmetiya ku heta niha kişandine dike ku ez zêdetir bi vî zimanî û bi vî gelî ve bême girêdan.”

Ma Sî dizane ku kurd hatine dagirkirin û bûne çar perçe. Polîtîkayên serokên kurdan ji nêz ve dişopîne. Piraniya hevalên wî yên kurd Bakurî ne. Di Newroza îsal de gava ku şagirtên kurd çalakiya cejnê saz dikin, Ma Sî jî yek ji wan kesan e ku di nav komê de cih digire. Di koroya stran û govendên kurdî de strana ”Can welat” dibêje û rastî coşeke mezin tê.
Repa Kurdî û Koma Rozerîn dildarên Ma Sî ne. Fîlmê bi navê ”Kûsî jî dikarin bifirin” dil û cegerên wî şewitandiye. Lewre jî dixwaze ji bo zarokên kurdan kar û xebatê bike. Beşdariya şoreşa kurdan yek ji daxwazên wî yên sereke ye. Merema dilê xwe jî bi vê hevokê eşkere dike: “Dixwazim li Kurdistana Azad bibim sefîrê Çînê.”

 

Derheqa nivîskar da

Salih Kevirbirî

Anadolu Universitet (Zankoya Anadoluyê) – Fakulteya Ekonomî û Fakulteya Zanistên Siyasî // Heta niha 10 kitêbên wî bi zimanê kurdî û tirkî hatine çapkirin û ev kiteb li çend zimanan hatine wergerandin // Her wiha di 3 salên dawî de li ser kurdên Sovyetê 20 fîlmên documenter bi zimanê kurdî amade kirine// Di nav Navenda PEN-a Kurd de Berpirsê Nivîskarên Diyasporayê ye û Endamê Enstîtuya Kurdî ya Stenbolê ye.

Qeydên dişibine hev