HEFTÊ Û DU NEFÎ

HEFTÊ Û DU NEFÎ

Helbesteke xweş ya şairê mezin Arjen Arî ser dînê êzdîtîyê, ku di saxtîya wî da zêde nedihate zanîn. Ji vê helbestê ew helbestvanê mezin ber çavên me mezintir bû. Zimanê Arjen kurdî bû, dînê Arjen kurdî bû, dayka Arjen Kurdistan bû…

Malpera me ew peyda kir û bi we ra parve dike.

 

Arjen Arî

heftê û du nefî
û heft sed talan
me dît.
bi ser me de hatin
bi şûr û êrîş
û bi Qur’an!

me Ezda neda tu kesan;
ne ku ê me tenê bû û tune bû!

dabû dest me Ezazîl
ku ew qasid bû û wekîl
ê Ahûrra Mazda!
got me bixwînin
ev pirrtûk e ya Ezda!

em jî xwedî kitêb in
hêj berya Benî Îsraîl
me Laleş hene, me Nebî
me merqed hene, me Hadî
ne em in, ne jî me ne
yê kû jêke genimê neserridî!

me Ezda neda tu kesî
ne ku yê me bû û tune bû;
ew bi xwe bû yê me û wan
û ew bûn ê lat û pûtan
û ew bûn hevalê Ehrîman!

ne hevbeş, ne xemdar
bê şirîk û bê heval
me ew bi nav kir bi Ezadayî!
ew ê ku ez dame û tu jî dayî
û Xweda yek e
Ezda yek e
Homa yek e li şirîkayê!

wê bişewite
ew Xalidê Bin-Welîd!
tefand li me çira zer
û rûxand merqed û îd
ku qasidê Emer bû!
ya agirê devxeçer,
ya zimanê sojê,
bide pêy bişewitîne
Emer li dojê!

ji latê re kî xûz dibûn.?
kî bûn ew ê xwedîyê pirr-Xwedan.?
keya ax dikolan
û keya me dixistinê?
me nekir;
me dest navêt gulîyê jinê
mê û nêr her yek man
û hiz ji mirov kir rûbalî evdayî ;
lew berz û giranbuha ye
mirov bi xwe û ew dayî!

Ezda ez dame, tu daye
ma ji kê re ne Xweda ye.?
bêşik ne yê loma ye ;
ji min re Ezda
ji te re Xweda
ji yekî din re Homa ye!

Riataza

Derheqa nivîskar da

RIATAZA

Malpera nûçeyan derheqa kurdan û Kurdistanê da; Ji bo malûmatîyên zêde berê xwe bidine vê navnîşanê: info@riataza.com

Qeydên dişibine hev