Pirsa we û bersîva me – 46

Pirsa we û bersîva me – 46

Xwendevanên delal, wek hûn dibînin malpera me beşa xwe a bi sernaê ”Pirsa we û bersîva me” bi serketî bi rê va dibe. Rêvebira wê beşê nivîskara malpera me Nura Şane ye. Hemû pirsên ku redaksyonê ra têne şandin, em ji Nura delal ra dişînin û ew bi alîkarîya redaksyona malpera me bersîva pirsên we bide.

Vê carê Nura Şane ji bo bersîva du pirsan berê xwe da redaksyona malpera me. Berpirsyarê malperê bersîveke ha hazir kir. Fermo:

 

Pirsa Deryaya Çeko û bersîva Têmûrê Xelîl

 

Pirs 1: -Gelo hûn dikarin helbesteke kurdî a helbestvanekî kurd bêjin, ku gotinên wê bi henekî yên biçûkxistinê bin, lê bê fêmkirinê ku bi wê helbestê evîndar xweşîyên xwe li evîndara xwe dike, ango di rastîyê jê pir hez dike?

 

Bersîv 1: -Me helbesteke wisa dît, ew ya helbestvanê mezin Fêrîkê Ûsiv e, ku dibêje. Xuya ye ser evîndareke xwe nivîsîye, ku yeke hûrik û xweşik e:

 

Ez li te xim – tu tepek î

Ez te gez kim – tu gepek î

Ez pif kim – tuyê bipekî

Te hemêz kim – tu lepek î

 

Pirsa Canoyê Şemo û bersîva Têmûrê Xelîl

 

Pirs 2: -Gelo ev îdyoma kurdî tê çi maneyê?

Av-zarê flankesî/ê ji wî/ê ra nema.

 

Bersîv 2: Kesê/a xirabî ji kesekî/ê ra kiribû, hate pêşîya wî/ê, ango hate serê wî/ê. An ecêbek hate sêrî, an dada wî/ê kirin, ceza danê, ew kes kete nava rewşeke nemir-nejî, ku bûbû sebebê/a xeman û bedbextîyan. Gotineke pêşîyan a gelek nêzîkî vê fikirê heye: “Bextê bêbextan lê welgerîya”.

Riataza

Derheqa nivîskar da

Nura Şane

Nura Şane 2 zanîngeh temam kirine, yek a Zanyarîya Tundurustîyê, a din jî a Dadmendîyê, niha di nexweşxaneyeke biyanî da li Stembolê kar dike. Nivîsên wê bi taybetmendîyên naveroka xwe, bi zimanê kurmancî yê dewlemend va wê ji hemû nivîskarên kurd, xwesma nivîskarên jin, cuda dike û gelek kes dixwezin çav bidine wê.

Qeydên dişibine hev