Pirsa we û bersîva me – 52

Pirsa we û bersîva me – 52

Xwendevanên delal, wek hûn dibînin malpera me beşa xwe a bi sernavê ”Pirsa we û bersîva me” bi serketî bi rê va dibe. Rêvebira wê beşê nivîskara malpera me Nura Şane ye. Hemû pirsên ku ji redaksyonê ra têne şandin, em ji Nura delal ra dişînin û ew bi alîkarîya redaksyona malpera me bersîva pirsên we bide.

Vê carê Nura Şane bi alîkarîya xebatkarên redaksyona malpera me bersîva pirsekê ha da:

Pirsa Simkoyê Elî û bersîva Nura Şane

Pirs: Me – kurdên Qazaxistanê – bihîstîye, ku berhemeke nivîskarê kurd ji Ermenîstanê Xelîlê Çaçan di dibistanên Almanîyayê da têne xwendin. Gelo ew kîjan berhema wî ye? Eger bikaribin li ser vê meseleyê me bi hûrgilî agahdar bikin.

Bersîv:   Nivîskar û lêkolînerê kurd yê bi nav û deng Mehmet Gultekîn di nivîsa xwe ya ji bo 90 salîya bingehdar û rêvebirê radyoya kurdî li Rewanê Xelîlê Çaçan Muradov da dinivîse:

Dema meriv bi xwendekarên dibistana navîn û lîseyê yên li Almanya li ser çîrokan diaxife, gotin jixwe bi awakî tê ser çîroka kurdî a Xelîlê Çaçan a bi navê Nimm Dich in Acht vor den Ränken der Frauen (Ji şerê jina bitirse). Ev çîrok wek mînak di dersên wêjeyê da tê bikaranîn û şirovekirin.

Çîroka Ji Şerê Jina Bitirse di nav xwendekarên li Almanya da gelek navdar e; pirtûka ku vê çîrokê tê da cîh girtîye jî hema hûn bêjin, di gelek malan da û di hemû pirûkxaneyên Almanya da peyda dibe. Ji wan salan virda ye ku Hannelore Marzi wek nivîskar û her wisa wek çîrokbêj ji aliyê dibistan û saziyan tê vexwendin, wisa ku çi bajarên mezin û çi ên piçûk yek nemaye ku ew li wir beşdar nebûbe û ev çîroka sereke jî nexwendibe. Hannelore Marzi dibêje, dema ku ew di beşdariyan da çîrokan dixwîne û carina dora xwendina vê çîroka Xelilê Çaçan tê, hildide dawiya bernama xwe ji bona ku guhdarvanên wê heta dawiyê bimînin. Ew vê çîrokê êdî ji zûda ye ji ber xwe dizane û wê bi zarbêjî pêşkêş dike. Bi ser da ev çand sal in ku ev çîrok wek şano jî hatiye amadekirin û di sahneyên bajarên Almanyayê tê pêşkêskirin.

Bi kurtasî, ger ku hûn navê vê pirtûkê Orientalische Frauenmärchen û/an jî navê çîrokê Nimm dich in Acht vor den Ränken der Frauen bidin Google’yê hûnê rastî piştrastiya van gotinan û pêra gelek agahiyan li ser pirtûkê û bi taybetî jî li ser vê çîrokê bên.

Riataza

Derheqa nivîskar da

Nura Şane

Nura Şane 2 zanîngeh temam kirine, yek a Zanyarîya Tundurustîyê, a din jî a Dadmendîyê, niha di nexweşxaneyeke biyanî da li Stembolê kar dike. Nivîsên wê bi taybetmendîyên naveroka xwe, bi zimanê kurmancî yê dewlemend va wê ji hemû nivîskarên kurd, xwesma nivîskarên jin, cuda dike û gelek kes dixwezin çav bidine wê.

Qeydên dişibine hev