Pirsa we û bersîva me – 55

Pirsa we û bersîva me – 55

Xwendevanên delal, wek hûn dibînin malpera me beşa xwe a bi sernaê ”Pirsa we û bersîva me” bi serketî bi rê va dibe. Rêvebira wê beşê nivîskara malpera me Nura Şane ye. Hemû pirsên ku redaksyonê ra têne şandin, em ji Nura delal ra dişînin û ew bi alîkarîya redaksyona malpera me bersîva pirsên we bide.

Vê carê Nura Şane bersîva pirsekê ha da:

 

Pirsa Nurcana Temo û bersîva Nura Şane 

Pirs: -Gelek gotin û fikirên tirkî bi cûrê wergera dervayî qanûnên zimanê me ketine nava zimanê hinek kurdên ku zimanê xwe baş nizanin û heta di nav gelê me da bi xurtî bingehê xwe jî girtine. Gelo hûn dikarin kurdîya van gotin û fikiran ji me ra bêjin?

– ”wî diya xwe an hevalê xwe winda kir”

-”te çay girt?”

-”wana trên revand”

-”pere ser te heye?”

-”min kîlo girtîye”

-”birçîbûna te heye?”

 

Bersîv: Fermo, bersîvên me ev in:

– ”wî diya xwe an hevalê xwe winda kir”

-Ev hevok bi fikira ku dê an heval mirîye tê bikaranînê. Di kurdî da, herwiha di gelek zimanan da, tiştê an kesê ku tê windakirin, dikare bê dîtin jî. Vêca dê an heval ku mirin, êdî venagerin. Lema jî di kurdî da bi awayekî din dibêjin: -“Filankes mir“, “wefat bû“, “jîyana xwe ji dest da“ û h.w.d.

-”te çay girt?”

-di kurdî da mirov dikare bê girtin, derî dikare bê girtin. A rast ha ye: -“Te çay hilda?

-”wana trên revand”

-li vir qesta hevokê ew e, ku kesek an hinek kes dereng hatine bo trênê siwar bin, trên êdî bi rê ketîye. A rast ha ye: -“Em ji trênê man“.

-”pere ser te heye?”

-li vir tê fêmkirin, ku yek dixweze ji yekî/e din pere deyn bike. “Pere di bin wî/ê da heye“ bi kurdî ye, lê “Pere ser te heye“ bi tirkî ye. A rast ha ye: -“Pere cem te heye? “, an “Pere bi te ra heye?“

-”min kîlo girtîye”

-qesta hevokê ew e, ku kesek behsa zêdebûna giranîya bedena xwe dike. Di kurdî da ha ye: -“Ez qelew bûme“. Kurdên Sovyet dibêjin “Ez xurt bûme“.

-”birçîbûna te heye?”

-mebesta hevokê ew e, ku yek ji yekî/ê pirs dike, ka dixweze tiştekî bixwe an na. Di kurdî da a rast ha ye: -“Tu birçî yî? “, “Daxweza te a xwerina tiştekî heye?“.

 

Riataza

Derheqa nivîskar da

Nura Şane

Nura Şane 2 zanîngeh temam kirine, yek a Zanyarîya Tundurustîyê, a din jî a Dadmendîyê, niha di nexweşxaneyeke biyanî da li Stembolê kar dike. Nivîsên wê bi taybetmendîyên naveroka xwe, bi zimanê kurmancî yê dewlemend va wê ji hemû nivîskarên kurd, xwesma nivîskarên jin, cuda dike û gelek kes dixwezin çav bidine wê.

Qeydên dişibine hev