Delalek bi van helbestan li evîna xwe vedigere

Delalek bi van helbestan li evîna xwe vedigere

Delala Memê Recevî

 

Neke

Neke bêbexto neke,

Evîna xwe ser min ferz neke,

Dilê min dax kirî

Careke din dax neke.

 

Neke bêbexto, neke,

Dilê wêran t’alan neke,

Evîna kuştî dîsa nekuje,

Dilê xwe bê evînda

H’ed neke.

 

Neke bêbexto, neke,

Neç’îra dilê min nekuje,

Evîna min sêwî nehêle,

Min bê h’ub sewdeser neke.

 

Were,

Dergê dilê min dadaye

Ser evînê dil h’eznîye

Were min pêpes neke.

 

Were li min veger’e

Her şev bê deng têyî

Xewa ç’e’vêd min

Bê deng dir’evînî,

Diçerçirînî,

Min dêşînî,

Dil û kezeb

Jorda tînî,

Min t’ev êşê

Dihêlî t’enê

Û bê deng diçî.

 

H’eta k’engê

Tu min bêşînî ?

H’eta k’engê ?

Tu dilê min

Vajî bixûnî

H’eta k’engê?

 

Were li min veger’e,

Min nav bêdengîya

Evîna bê h’ub nekuje,

Were li min veger’e,

Steyrka min

Ji e’zmanê dilê xwe

Nevêje,

Were li min veger’e

 

******

Steyrkêd e’zmîn

Wek dilê bengî,

Diç’ûrisin

Li e’rşê e’zmîn.

Her yek dileke,

Dilek bi evîn,

Her yek r’uheke

R’uhek bi jîn.

Carna dixeyîdin

Ji evîna k’ûr,

Û jorda tên xwar

Nav bêdengîya dûr.

Riataza

Derheqa nivîskar da

RIATAZA

Malpera nûçeyan derheqa kurdan û Kurdistanê da; Ji bo malûmatîyên zêde berê xwe bidine vê navnîşanê: info@riataza.com

Qeydên dişibine hev