Teyara textik a Dilêr Serhed derçû!

Teyara textik a Dilêr Serhed derçû!

Teyara Textik, pirtûka du çîrokên gelêrî ya Dilêr Serhed ji alîyê Weşanxaneya Lîsê ve hate weşandin

Dilêr Serhed (j. 1995, gundê Kanîreşê yê Gîhadîna Qerekilîsê), wekî berendamekî nivîskarîyê û berhevkarîya berhemên zargotina zimanê Kurdî, di vê berhema xwe ya pêşîn a bi navê Teyara Textik de çîrokeke gelêrî ya dirêj a bi navê Teyara Textik û çîrokeke gelêrî ya kurt a bi navê Bîbilcan û Heft Bira tevî çîroka xwe ya şexsî ya guhdarîkirina li van çîrokan pêşkêşî xwînerên zimanê Kurdî dike.

Di vê dewr û dewranê de, ku qedrê çîrokên kana xewn û xewn xeyalên afirîner bere bere kêmtir tê girtin, nivîskar û berhevkarê xort, Dilêr Serhed, amajeyê bi tiştekî zehf girîng dike, ew jî ew e ku divê em gencîneyên bîra xwe ya zargotinî ji dest nedin û bi rê û şêweyên cihêreng wan veguhêzine serdema xwe û dahatûyê. Çi ku, ne cîyê gumanê ye ku bêyî vê gencîneya navhatî çênabe ku wêjeyeke me ya neteweyî ya xurt û cîyê şanazîyê pêk bê. Ew qonax jî bi saya serê vê pûtepêdanê dê berdewam bibe, çawa ku Dilêr Serhed dibêje:

“Em bi malbatî îşev li dora tenûra germokî civîyane. Ji ber ku bavê min soza du heb çîrokan dabû me. Erê, yek jî çîrok hene, ên ku me aş dikin, dibine sebra dilan û dibine stargeha me zarokan. Çîrokên ku zarok bi zarok ’emir derbas kirine.

Bavê min çîrokbêjekî xweşik e li ber dilê min. Nizanim bavê min li hinde çîrokan ji kû guhdarî kiriye û rêzî hişê xwe kirine. Bi tenê bi gotina cîya min, bavê min di biçûktîya xwe de zarokekî zehf yanser î bi rik bûye, tiştê ku ew aş bikira jî çîrokên kalikê min bûne û çîrokên civatan bûne ku di dîwanan de têne gotin.”

Dilêr Serhed girîngîya çîrokên dêrîn ên bav û kalên me careke mayîn tîne bîra me.

 

Teyara Textik

Dilêr Serhed

Çîrok, 66 rûpel

Çapa pêşîn, Reşemîya 2018’an

Weşanxaneya Lîs, Amed

 ISBN: 978-605-9295-89-5

 

Riataza

 

Derheqa nivîskar da

RIATAZA

Malpera nûçeyan derheqa kurdan û Kurdistanê da; Ji bo malûmatîyên zêde berê xwe bidine vê navnîşanê: info@riataza.com

Qeydên dişibine hev