ZIMANÊ WAN JÎ QEDEXE YE!

ZIMANÊ WAN JÎ QEDEXE YE!

Zeynelabidîn Zinar, nivîskar/lêkolîner

Rojek ji rojan, çend roj piştî Sersala Kurdan, ez li Stockholma Paytexta Kultura Dinyayê li teqsiyeke ticarî siwar bûm û dê biçûma cihekî.
Min bala xwe da şifêrî, ser û çavên wî wek yên çîniyan bû. Dema ez û ew ketin suhbetê, camêr xwe bi min da naskirin û yekser got:

”Ez Tirkê Uygur im, li welatê me ziman qedexe ye û em nikarin tiştek ji çanda xwe bi kar bînin.”

Min jî gotê:
”Çewa zimanê miletekî tê qedexekirin?”

Camêr dev pê kir û çêr, dijûn, nifir û afir li Çînê barandin.

Min jê pirsî:
”Têkiliya te bi Tirkiyê re heye?”

Got:
”Ez gelek sal li Tirkiyê mame, baş dinasim!”

Suhbeta me bi zimanê swêdî her berdewam e, min gotê:
”Tirkiye jî zimanê Kurdan qedexe kiriye!”

Ruyê Tirkê Uygur qermiçî û damara qolincê ew hingavt, got:
”Na, na! Tirkiye demokrat e, ne wek Çînê ye. Li Tirkiyê her tiştê Kurdan heye. Kurd li wirê dibin her tişt.”

Min behsa nijada xwe nekir lê min gotê ku ”ez lêkolîner im, ez rind dizanim ku ji 1925 hetanî 2007-08an Kemalîzmê wehşetên herî mezin bi serê Kurdan ve aniye…”

Tirkê Uygur her ku çû, pesnê Tirkiyê da û behsa ku ji serê pêşî ve demokrat e, kir.
Dema em gehan navnîşana ku ez ê peyabibim, min diravên wî danê û min gotê:
”Ez Kurd im, zimanê me, her tiştê me qedexe ye, lê niha hin derfetên biçûk ji bo zimanê me çêbûne. Qeymeqamê Tirk (Hayrullah Yildiz) dema dît ku ez bi kurdî dipeyivim, gote min EŞŞEKÇE KONUŞMA û min jê pirsî: ´Heta niha berpirsekî Çînê gotiye yekî ji we Tirkên Uygur: EŞŞEKÇE KONUŞMA?”

Tirkê Uygur bêdeng ma, serê xwe berjêr kir û bi riya xwe ve çû…

Riataza

Derheqa nivîskar da

Zeynelabidin Zinar

Bav û kalên wî tev mela bûne û ders dane şagirdan. Ew bi xwe jî berhemê Medreseya Kurdî ye. Wî 11 sal Medrese, 3,5 sal Imam-Xetîm, çar sal lîse xwendiyte. Rêvebirê malpera www.pencinar.se e. Bi dehan pirtûkên folklorî çap kirine.

Qeydên dişibine hev