TC ÇIMA JI YEKÎTÎYA AXA ROJAVAYÊ KURDISTANÊ DITIRSE?

TC ÇIMA JI YEKÎTÎYA AXA ROJAVAYÊ KURDISTANÊ DITIRSE?

Xwendevanên hêja, wek me hûn agahdar kiribû, emê çend gotarên yek ji sîyasetmedarê zane û welatparêzê rasteqîn ji Kurdistana Bakur Fuat Önen di rûpelên malpera xwe da çap dikin. Fermo, ev yek ji wan gotaran e.

 

Fuat Önen

Divê em hedefa dewleta Tirkîyê baş zanibin. Ji xwe ew pir bi eşkere û zelalî dibêjin ku sedema daketina wan a Bab û Cerablûsê jî ji bo pêşîlêgirtina qorîdora Kurdan e. Mebest ji vê ev e ku yekîtîya axa rojavayê Kurdistanê pêk neyê. Ji bo ku pêwendîyên di nav Kobanî û Efrînê de bên qutkirin ket Bab û Cerablûsê. Hedefê dewleta Tirkan (TC) ya stratejîk ev e.

TC çima ji yekîtîya axa rojavayê Kurdistanê ditirse? Bi sedem ku temama sîyaseta Kurdan vê nepejirin û neparêzin jî; zû an dereng yekîtîya Başûr û Rojava wê têkeve rojevê û bi yekîtîya Başûr û Rojava Kurdistan ê bigîhêje Behra Sipî, Kurd ê ji hegemonyaya van dewletên dagirker xelas bibin û ji xwe re derîyekî vekin. TC vê dibîne û çi ji destê wê dike ku rê li vê pêşketinê bigire.

TC li Sûrîye ne aktoreke bi serê xwe ye. TC li wir bi serê xwe tevnagere; wek nimûne, TC nikare li rojavayê Feratê bêyî Rûsyayê tevbigere û çalakîyên xwe pêk bîne. Li rohjelatê Feratê bê destûra Amerîkîyan nikare tevbigere. TC li wê derê di nav Amerîka û Rûsyayê de manewreyan pêk tîne, heta di bin re bi rejîma Sûrî û Îranê re jî têkilîyan pêk tîne.

Di vê sedala dawîn de, heta têkçûna Sowyetê van her çar dewletan bi hev re pêşî li azadîya Kurdistanê digirtin. Di van 15-20 salên dawîn de têkilîyên van dewletan hinekî xerab bû, di ênîyê sîyasî yên cuda de cî girtin, pirtirîn jî TC û Îranê. Lê di van salên dawîn de ji bo serxwebûna Kurdistanê, ji nuh de li rêyan digerin ku bi hev re karibin pêşî li serxwebûna Kurdistanê bigirin. Ew ê karibin an nikaribin vê yekê pêk bînin? Pirtirîn bi helwesta Amerîkî û Rûsan ve girêdayî ye.

ÊRÎŞA TC ya EFRÎNÊ WÊ BIBE DESTPÊKA DAWÎYA TCyê

Ez ne di wê bawerîyê de me ku TC yê karibe Efrînê dagir bike û li wir pêşî li Kurdan bigire. Bi sedem ku TC nikare bakurê Kurdistanê wek berê bi rêve bibe, anuha her navçeya bakurê Kurdistanê ji bo TC bûye barêgehên leşkerî û nêvîyê artêşa xwe li Kurdistanê bi cî kiriye. Ev temam ji ber pirsgirêka serxwebûna Kurdistanê ye, hek hewl bide ku hicûmeke leşkerî pêk bîne jî, ev ê bibe destpêka dawîya TCyê.

Zû an dereng, di vî Şerê Cîhanê yê Sêyemîn de ev her du dewletên esasî yên herêmê (Îran û TC) jî mecbûr in ku têkevin nav vî şerî. Heta ku ev her du dewlet neyên guhertin, nîzameke nuh çênabe, hêzên cîhanê jî bi vê zanin. Dewleta Tirka dixwaze pêşî li serxwebûna Kurdistanê bigire.

QEDERA KURDAN DEWLETBÛYIN E

Sîyasetmedarên Kurdan çi bibêjin jî, xwişk û birayên me yên PYD, YPG û PKKê her dem bibêjin ku “em dewletê naxwazin, ji me re dewlet ne lazim e, dema dewletbûnê derbas bûye” jî, lê TC bi heşmendîya dewletê difikire û ew dizane ku ji bo TC xeterîya herî mezin dewletbûyina Kurdistanê ye. Qedera Kurdan dewletbûyin e, hek sîyaseta Kurdan vê yekê fahm neke jî, dewletên dagirker bi vê yekê zanin. Bi sedem ku tu nebî dewlet tu nikarî xaka xwe biparêzî, ew çend basît û eşkere ye.

Ji Şengalê heta Kobanîyê milyonek Kurdên me ji bo çi koçber bûn? Bi hezaran şervanên me hatin kuştin ji bo çi hatin kuştin? Ji ber ku em ne dewlet bûn, sîlehên dewletan bi me re tunebûn. Dewletên dagirker bi van çîrokên ku “ em dewletê naxwazin” naxapin.

Di vî Şerê Sêyemîn yê Cîhanê de aktorên sereke Amerîka û Rûsya ne, ez bawer nakim ku rê lê vekin ku TC têkeve Efrînê. Dibe ku TC bi rejîma Sûrî û Rûsyayê re li hev bikin ku, Efrînê teslîmî rejîmê bikin. Lê çi dibe bila bibe, divê hemû Kurdên her çar perçeyên kurdistanê û yên li hemû dinyayê li hember vê êrîşa dagirkerî derkevin. Dewleta dagirker ê têkve here, lê divê em jî amadekarîyên xwe bikin û karê xwe bikin. Hek hemû Kurd li hember vê êrîşa dagirker derkevin, dikarin pêşî li vê êrîşê bigirin. Ev şerekî demdirêje û ji îro heta sibê naqede. Ev şer dikare bist,sîh salan bidome. Biya min div î şerê demdirêj e divê sinifa sîyaseta me dewletbûyina Kurdistanê ji xwe re bikin armanc û li dor vê armancê yekîtîya neteweyî pêk bîne. Bê vê yeke tu rêça din tüneye.

HÊZÊN KURTÎLXUR YÊN TCyê NE

Tu gefeke leşgerî ya PYD û YPG li ser Dewleta Tirkan tüneye. Gefa li ser TC dewletbûyina Kurdistanê ye. Hêzên ku TC li wan xwedî derdikeve kurtîlxurên Tirkîyê ne, ne hêzên sîyasî ne. Tikîyê bi çek bi mûçe ev kurtîlxurnan anîne serhev. Ew hêz bi serê xwe nikarin li hember şervanên Kurdan şer bikin. Hek TC ji wê derê vekişe ev hêzên kurtîlxur nikarin li wan deran bimînin. Vana ne terefekî sîyasî ne û li Sûrîyê ne xwedî temsîleke sîyasî nin. Gava ku TC daket Cerablûs û Babê xwest ku Minbicê jî bi dest xîne; Amerîkî û Rûsan ala xwe li wir bilind kirin. TC yê got ku “em ê herin Efrînê”, Rûsan got ku “em li vir baregeheke leşkerî ava dikin”, ji ber vê yekê ew ‘Mertala Feratê’ qedandin. Divê em hewl bidin ku ev têkçûna TCyê dubare bibe ku nikaribe êrîşî Efrînê bike. Lê pirtirîn bi balansa di nav hêzên navdewletî ve girêdayîye. Hevdîtinên di nav Akerîka û Rûsyayê de, di nav wan û Tirkan de çi ne? Em baş pê nizanin. Lê wezîfeya me ya sîyasî ew e ku em bi temama îmkanên xwe hewl bidin ku pêşî li vê hicûma Tirkan bigirin.

TC dikare li dijî Kurdan bi her kes, hêz û rejîmê re hevalbendîyê bike. TC di destpêkê de dixwest rejîma Sûrîyê hilweşe, wê çaxê Amerîka jî dixwest ku ev rejîm hilweşe. Lê piştî derbeya li Misirê pêk hat, navbera TC û Erebistana Siûdî xera bû, nexweşî ket nav têkilîyên TC û Amerîkayê. Amerîka, Siûdî û Îsraîlê piştgirî dan derbeya Misirê; TC jî li hember derket. Lê TC di van salên dawîn de dev ji wê sîyaseta xwe berdaye. Ango sîyaseta TC li Sûrîyê têk çû. TC nika manewra dike ku li Sûrîye sîyaseteke nuh ava bike. Hek di encamê de karibe pêşî li dewletbûna Kurdistanê bigire, TC dikare bi her kesî re hevalbendîyê bike. Lê Rûsya nikare bi rehetî Efrînê radestî TCyê bike. Bi sedem ku rejîma Sûrîye li Rojava hîn jî heye, li Cizîr, Qamişlo û hin deverên din hîn jî dezgehên rejîmê hene. Gava ku li Efrînê hevkarîyeke Sûrîye, Rûsya û TC bê avakirin, ew ê li her deverê rojavayê Kurdistanê şerê Kurdan gûr bive. Kurdên hewl bidin ku rejîmê ji Cizîrê derxin,şer dê berfireh bive. Divê sinifa sîyasetê ya Kurdistanê xwe ji şerekî demdirêj re amade bike.

bazekurdistan.com

Derheqa nivîskar da

RIATAZA

Malpera nûçeyan derheqa kurdan û Kurdistanê da; Ji bo malûmatîyên zêde berê xwe bidine vê navnîşanê: info@riataza.com

Qeydên dişibine hev