Pirsa we û bersîva me – 111

Pirsa we û bersîva me – 111

Xwendevanên delal, wek hûn dibînin malpera me beşa xwe a bi sernavê ”Pirsa we û bersîva me” bi serketî bi rê va dibe. Rêvebira wê beşê nivîskara malpera me Nura Şane ye. Hemû pirsên ku redaksyonê ra têne şandin, em ji Nura delal ra dişînin û ew an bi xwe, an jî bi alîkarîya redaksyona malpera me bersîva pirsên we bide.

Vê carê xwendevaneke me du pirsên girêdayî bi hevdu ra ji me kirine. Nura Şanê şêwra xwe bi berpirsyarê malperê ra kir û di encamê da ev bersîv derketin:

 

Pirsa Mert Subaşı û bersîva Nura Şane

 

Pirs: Gelo bo çi li Kurdistana Bakur bi mîlyonan kurd ji çeqilmast”ê ra dibêjin ”dew”?

 

Bersîv: Hemû mesele ew e, ku em di gelek meseleyan da çav didine tirkan. Gelek caran kurdên Bakur bi tirkî difikirin, bi kurdî dipeyivin. Mesele, dewsa bêjin ”Ez ji trênê mam”, dibêjin ”Min trên revand”, dewsa bêjin ”Gelo tu birçî yî?”, dibêjin ”Birçîbûna te heye?”, dewsa bêjin ”Pere bi te ra heye?”, dibêjin ”Ser te pere heye?” å h.w.d.

Hinek caran jî dewsa gotinên kurdî gotinên tirkî bi kar tînin. Lê di vê pirsê da zelalîyek lazim e bê kirinê. Hinek gotin hene, ku gotinên kurdî ne, lê ji tirkî derbazî zimanê me bûne. Ango, ewana di nav zimanê me da kemilîne û bûne gotinên me. Lê nayê qebûlkirin, ku dewsa gotinên kurdî gotinên tirkî yên wisa bi kar bînin, ku di zimanê kurdî da tunene. Ango, neketine nava zimanê me, bi zimanê me ra ne kemilîne, neketine qalibê kurdî, nebûna milkê zimanê me. Ev jî di rûyê ne baş zanebûn an jî kêmzanîna kurdî ye.

Lê bikaranîna gotina ”dew” dewsa gotina ”çeqilmast” nakeve di nav van herdu kategorîyan da. Wê demê bo çi piranîya kurdan gotina ”çeqilmast” danîne alîyekî û gotina ”dew” bi kar tînin? Mesele ew e, ku di rûyê lawazbûna zimanê tirkî da ji wan herdu gotinan ra gotinek tenê heye, ku jê ra dibêjin ”ayran”. Lê ew herdu gotin tam du gotinên ji hev cuda ne. ”Çeqilmast” ji çeliqandina mast çê dibe, lê ”dew” ji kilana sirsûmê çê dibe, gava rûn jê derdixin, di bin da dew dimîne, ku tê da rûn tune, lê di mast da rûn heye.

Ferqa van herdu gotinan di gotineke pêşîyan da jî zelal xuya dibe: ”Nan û mast xwerina rast, nan û dew xwerina derew”.

Riataza

Derheqa nivîskar da

Nura Şane

Nura Şane 2 zanîngeh temam kirine, yek a Zanyarîya Tundurustîyê, a din jî a Dadmendîyê, niha di nexweşxaneyeke biyanî da li Stembolê kar dike. Nivîsên wê bi taybetmendîyên naveroka xwe, bi zimanê kurmancî yê dewlemend va wê ji hemû nivîskarên kurd, xwesma nivîskarên jin, cuda dike û gelek kes dixwezin çav bidine wê.

Qeydên dişibine hev

Bersîvekê binivîse

Your email address will not be published. Required fields are marked *