Xatirxwastin ji Efrînê

Xatirxwastin ji Efrînê

Senar – Mûsa Qulîkî Mîlan

 

Xatirxwastin ji Efrînê

Wek ya Mem û Siyabend e

Ku li dû Zînê û Xecê

Bi tîra jan û hesretan

Kezeba wan tê hingaftin!

Malavayî ji Efrînê

Wek nêrgizên sêwiyan in

Ku landika dilgiran da

Bi hezar lava û daxwaz

Pey dê, bavan têne hîştin!

Xatirxwazî ji zeytûnan

Mîna poşiya giyan e

Ku li ser darên diriyan

Bi destê Zambiyên xwînrêj

Kaş bibe, ware daxistin!

Malavayî ji Efrînê

Wek birînkûran dimîne

Ku riman defa sîngê wan

Bi xedarî hingaftibin

Ser da derbe bên lêxistin!

Xatirxwastin ji Efrînê

Wek wan dê, bavan dimîne

Ku merxa xortê desthine

Goristanê da biçînin

Û bi meraq bên derxistin!…

Gava ew wiha dijwar e

Divê em pir hêvîdar bin

Bi destê şêr û şepalan

Dê azad bibe Qudsa wan

Hov ê jî bêne şikestin.

 

Riataza

Derheqa nivîskar da

RIATAZA

Malpera nûçeyan derheqa kurdan û Kurdistanê da; Ji bo malûmatîyên zêde berê xwe bidine vê navnîşanê: info@riataza.com

Qeydên dişibine hev