HELWESTEKE PÎROZ Û RAST: ÇEPERÊN TENGFİKİRÎNÊ HÊDÎ HÊDÎ TÊN RÛXANDİN

HELWESTEKE PÎROZ Û RAST: ÇEPERÊN TENGFİKİRÎNÊ HÊDÎ HÊDÎ TÊN RÛXANDİN

MÎNAKA AMADEKİRİN Û ÇAPKİRİNA „RÊBERA RASTNİVÎSÎNÊ“

Bayram Ayaz, nivîskar/sîyasetmedar

 

Ez di vî karî de gaveke xêrê û hêviyekê dibînim û dixwazim bi taybetî balê bikişînim ser vê yekê.

Bi qasî ku ez dişopînim, ev xebata ku di bin sîwana Weqfa Mezopotamya (Mezopotamya Vakfı) de pêkhat, xebata yekemîn e ku zimanzanên Kurd çeperên îdeolojiyan û “yasaxên” rêxistinan dirûxînin û ji bo karê akademîk-lînguistîk dighînin hevdu!

Dibe ku hin nas û dost bêjin, “karên Komxebata Kurmanciyê karekî wisa bû”. Heta dereceyekê ev rast e. Lê ew mirovên ku beşdarê karê “Komxebata Kurmanciyê” bûn û dibin, ji aliyekî tevgera Kurdî bûn. Mixabin van 15-20 salên dawî xebatên ser ziman û çanda Kurdî jî li nav aliyên “hezkiroxên pkkê” û yên din bûye dû beş! Li nav hûnermendên me yên muzîkê jî rewş wisa ye. Lê dibînim ku di vê xebatê de, heta dereceyekê ev bend û çeper hatiye rakirin.

Ji bo min bi qasî qedr û qîmeta vê xebata amadekirin û çapkirina “Rêbera Rastnivîsînê”, bi ewqasî jî ev nêzîkbûn helwesteke bi rûmet e. Em hemî divê qedrê vê helwestê bigrin û nehêlin ku zimanê Kurdî bibe alavê tengfikirînê û aletê “grupcîtiyê”! Kî dike bila bike, divê em hemî bi hevra li dijî derkevin. Bêjin: Ziman û çand û hûner, saman û sermiyanê hevbeş ên gel û milet in. Nabe rêxistin bi vê mijarê bilîzin. Divê hemî kesên zana, lêkolîner, akademîker, hunermend û pisporên me di vê mijarê de şiyar bin, xesas bin, xwedî helwesteke zelal û ronî bin û nehêlin ev tengfikirî zêdetir zirarê bide me. Heta nuha bi têra xwe zirar da me. Êdî bes e, heta kengî?

Hêvîdar im, ev noqte bala xuşk û birayên din jî bikişîne û were axaftin û nirxandin.

Bêguman ev pirs, mijara nivîsên bi serê xwe ye. Bila ev kurtenivîsa min bo rûpela me ya bi qedr û qîmet RIATAZA wekî pêşniyariyek be ji bo şîrove û nirxandinê.

Sernivîsa vê kurte nivîsê HELWESTEKE PÎROZ Û RAST: ÇEPERÊN TENGFIKIRÎNÊ HÊDÎ HÊDÎ TÊN RÛXANDIN e. Bila gotina dawî jî wek tika be, bila bang be: Ji kerema xwe çeper û astengiyên “grupçî” li pêş xebatên zimanî têkbidin! Hêz û kanînên xwe bigîhînin hevdu, berhemên pêdivî û hêja biafirînin û bidin ber destê miletê me. Miletê me jî dê dilşad be û dê bêje we “spas ji we re, destê we sax û qewet be ji we re bo van kar û xizmetên we yên bi qedr û qîmet”!

Eger em xebatên bo ziman û çand û hûner û dîrokê ji nav dest û lepên „tengfikirînê“ û „grupçîtiya partiyatiyê“ derbixin, wê demê em dikarin bêjin: Bi rastî em bûn şagirtên Melayê Cizîrî, Ehmedê Xanî, Celadet Mîr Bedirxan û bi dehan xizmetkarên din ên ziman û çanda Kurdî!

 

Ji alîyê redaksyona RIATAZA da:

Ev nivîsa delal ya ser karê bo zimanê me pîroz nivîsa sisîyan e, ku malpera me çap dike. Em bi vê helwesta xwe sipasîyê ji Komxebata Kurmancî dikin, hewil didin xwendevanên xwe derheqa giringîya vê xebata delal da hayadar bikin, bo ew pirtûk bibe xemla her maleke kurdan.

 

Riataza

Derheqa nivîskar da

RIATAZA

Malpera nûçeyan derheqa kurdan û Kurdistanê da; Ji bo malûmatîyên zêde berê xwe bidine vê navnîşanê: info@riataza.com

Qeydên dişibine hev