Xebatkarê Rock û Bluesa Kurdî: Mirov

Xebatkarê Rock û Bluesa Kurdî: Mirov

Hevpeyvîna Mela Mihyedîn bi Mirov ra

 

“Mirov”, mirovekî esîl, qedirbilind û hunermendekî li pey sîya xeyalên xwe ye.  Di muzîka Kurdî de kêm kes hene muzîka rock û bluesê îcra dikin. Bi rastî jî îcrakirina muzîka rock û bluesê karekî pir zehmet e. Vî karê zehmet bi awayekî serkeftî dike. Dengekî wisa zelal li ser e, wekî çemê biharan dike guşeguş. Dengê wî dengek xwezayî ye û meriv qet jê aciz nabe. Me pirsên xwe ji cenabê wî kir û wî jî bersiv da pirsên me.

1) Tu ji me re dikarî qala jîyana xwe bikî. Mirov kî ye?

Emrê min di navbera 26 û 30î de ye. Diya min û bavê min nizanin ez di kîja salê de hatime dinê. Yek dibê 1990î,  yê din jî dibê 1993an hatî dinê. Lê bi min, ez her tim 22 salî me. Kes nizane ez çend salî me. Ez jî nizanim.

Erê, ez xebatkarim. Pirtir jî xebatkarê muzîkê. Li kolanê, li ser dikê, li bajaran û hema çi û li ku derê bikeve serê min, ez li wê derê dixebitim. Ne tenê ji bo muzîkê jî, ji bona xebatên din jî wiha me ez. Aniha jî min li otelekê dest bi karekî kir. Lê ez dixwazim tenê li ser muzîka xwe bixebitim. Ev jî divê demê de ne pêkan e. Bi eslê xwe ez ji Bismila Amedê me. Di halê hazirde ez li Stembolê dijîm. Ez piçekî helbestvan im. Piçekî muzîkjen, piçekî gerok û piçekî jî “Kêzik”ê xwe me. Wekî din, ez mirov im. Merivê mirova me.

 

2) Te navê albûma xwe danîye “Kêzikê Sergêj”. Ev nav ji ku tê û çîroka vî navî çi ye?

Bi rastî çîroka vî navî ne hewqas giran û kûr e. Lê çîroka wê dirêj e û ez bim ne lazime were gotin. Ez dikarim vê gotinê bibêjim: “Kêzikê Sergêj” ez im.

 

3) Meraqa muzîkê kengî li te peyda bû û ev ji kengî ve ye te dest bi muzîkê kirîye?

Ez ji zarokatîya xwe ve di nava muzîkê de bûm. Di civata zarokatîya min de yê deng xweş û bi dengê xwe navdar ez bûm. Wexta em kom di bûn ji bo leystik û lotik û xebroşk û çîrokan, dawiya dawî  mesele dihat ser stranbêjiyê û min di got:

“Wax hemşerim, wax hemşerim

Memleketimi özledim

Anam anam babam bir tarafta

Yari özledim” (Wax hemşehrê min, wax hemşehrê mi/ Min bêrîya welatê xwe kir/ Dê û bav li alîyekî/ Min bêrîya yara xwe kir)

Min û hevalên xwe bi hev re dîsgotinên hemû stranan digotin. Zarokatî ax zarokatî, çiqasî tiştekî xweş, bi kelecan e û ji dil e!

Wext derbas bû û dem hat û min xwest ez bi awekî profesyonelî deng û besteyên xwe bi kar bînim. Ji bona wê jî min xwest ez herim mekteba hunerê an jî qonservatûwarê lê çênebû. Li hev nehat. Ez hê jî bi amatorî dixebitim.

 

4) Te strana Ercan Bîngol ya bi navê “Kûçik Hatin” bi awayekî serkeftî strandîye.  Di pêşerojê de tu û Ercan Bîngol hûnê bi hev re xebatna bikin?

Ercan Bîngol, B. B. Kîngê min e. Bluesvan e. Xweş dibluesîne. Kêfa min pir ji mirovatîya wî  û ji muzîka wî re tê. Em di tekilîyê de ne. Di demek nêzde em ê bi hev re karekî xweş çêbikin. Slav ji wî û bluesa wî re. Ercan Bîngol rih e.

 

5) Bi saya Rojbîn Kizil Mashupa Kurdî (Kurdish Mashup) li ser malperên medyaya civakî deng veda. Gellek muzîkjenên me jî dest bi xebatên Mashupê kirin. Li ser vê yekê tu çi difikirî?

Bi rastî ez xwe pir yekî mezin nabînim. Pir tişt meriv dikare bibêje li ser vî karî û li ser van hevalan, lê bila bimîne aniha. Ez dîsa jî dikarim vê bibêjim: Ew xebat tunebana jî dibû.

 

6) Tu ji kîjan terzên muzîkê û ji kîjan muzîkjenan hez dikî?

Kêfa min ji sound û motîfên rockê re tê. Yên soft jî yên hişk jî. Rock xweş e. Rock ji dil e. Rock şer û aşitîya mirovan e. Ji xwe ez heyranê Bob Dylan û Ciwan Haco me. Ew pîr û rêberên min in. Li ser her dû hunermenda min stranek jî çêkir. Wexta wê hat ez ê parve bikim. Ji muzîka klasîk ya kurdî jî hez dikim. Wekî din pir hunermend û kom hene yên ku ez wan guhdar dikim. Koma Wetan, Mihemed Şêxo, Erîc Clapton, Johnny Cash, Sîya Şevê, Koma Rewşen, Hindi Zahra,The Beatles, Haluk Levent, Sîdar, Ercan Bîngol, Yaşar Kurt, Kesmeşeker, Quen, Mirady, Ferec, Teoman, Edîth Pîaf, Mohsen Namjoo, Pînk Floyd…  yên ku hatin hişê min ev in.

 

7) Tu kîjan muzîkjana wek “Pîrê Muzîka Kurdî” dibînî?

Ciwan Haco, Koma Wetan, Mihemed Şêxo, Sîya Şevê, Şivan Perwer û Kerapetê Xaço…

 

8) Herkes dikare starnan bêje û bibe hunermend?

Dikare, çima nikaribe. Di dil û nêrîna mirov da hebe, bi min dikarin.

 

9) Bi te muzîka Kurdî niha di çi astê de ye?

Muzîka kurdî di astekî mezin û baş de ye lê cihê xwe nabîne. Heqê xwe nagire. Leqayî neheqîyê tê.

 

10) Çi cudahî di navbera “stranbêj” û “hunermênd” de heye?

Ez çawa bînim zimên. Ev pirsek û pirsgirêkeke mezin e. Ez dikarim tiştekî wiha bibêjim: Ez bi xwe nikarim ji xwe re bibêjim hunermend an jî ‘hozan’. Lê ez dikarim bibêjim ev kes ne hunermend e an jî ne ‘hozan’e. Ev jî, li gorî min wiha ye.

 

11) Albuma herî bêtir li ser te bandor kirî kîjan bû?

Ez dikarim bibêjim hemû albûmên Dylan û Ciwan Haco. Wekî din, Sîya Şevê: Zeng û Li Pey Sîya Xwe. Mirady: Xwelî. Koma Wetan: Azadî. Ahmet Kaya: Tedîrgîn. Tom Waîts: Real Gone. Haluk Levent: Kral Çiplak

 

12) Li ser muzîkjenên kolanê yên Kurd çi difikirî?

Qet baş nafikirim bi telaq. Xwezî qet derneketibana kolanan. An jî derketina bi awekî xweş, bi enstrumanên paqij û bi akort bana. Ez enstrumanîstekî ne hewqasî hêja me. Lê enstrumana bê akort û ji dengê şaş û çewt jî piçekî fêm dikim. Ji ber vê yekê (û ne tenê ji ber vê yekî jî) xwezî qet derneketibana. Ji ber van hevalan ji muzîka kolanê sar bûm. Berê derdiketim Îstîklalê. Bi saya van ev bû çend sal dernakevim kolanên Taksîmê. Ez dirêj nekim ewê çêtir be ji bo min.

 

13) Meriv çawa dikare muzîka baş û ya xirab ji hev veqetîne?

Muzîka xirab xirab e û li ber çavan e. Nêrînek objektîf û vekirî bes e ji bo vî tiştî.

 

P.S.

Hûn dikarin li ser van lînkên li jêr li stranên hunermend guhadrî bikin.

Youtube: https://www.youtube.com/channel/UC2dx46xgtyfrQieDL1Un9pg

Spotify: https://open.spotify.com/album/2rEJJqGiyRkk1vctYg47Sc?si=yaEh7R9FR_q3q3m0n7RizA

 

Riataza

Derheqa nivîskar da

Mela Mihyedîn

Zaroktîya wî di nav ‘erûz û berhemên klasîk de derbas dibe. Ji bo ilm berê xwe dide Hezex, Batman û Stenbolê. Herî dawî li Amedê xwendina xwe temam dike û îcazeta xwe ya beşa Mamosetîya Zanistên Civakî werdigire. Demeke dirêj li Amedê dersdariya Ziman û Wêjeya Kurdî dike. Nivîsên wî di kovarên “Nûbihar” û “Wêje û Rexneyê” de derketine.

Qeydên dişibine hev

Bersîvekê binivîse

Your email address will not be published. Required fields are marked *