Dostê min î wefakar

Dostê min î wefakar

Egît Yazar 

Du sal berê ez li Sêwazê bûm. Piştî me şantiyeya xwa li devê bestekê vegirt. Ev Generalê ser reş ê teqawîtbûyî hat û hewisî me bû.

 

Çavekî wî rijyayî bû û ji her du nigên xwe yên dawî şeht bû. Li gorî gavanê gund digot, ev kûçik(heşayî wî) di xortaniya xwe de tirs lê tine bûye. Gavên digot: hem gurxenêq bû, hem dajot li ser hirçan û hem jî li berazan jî dixist. Lê carekê di şerrekî giran de, bi giranî birîndar dibe; hem çavekî wî dirje û hem jî ji pişta xwe derbeke xedar dixwe. Û piştî hingê xwediyê wî, wî berdide.

 

Wek mesela negotî; mêrxas, mêrxasan dinase. Û em li hevdu xwedî derketin. Bi qasî nanê min dida wî, wî deh qat ew nan heq dikir; bi wî halê xwe yê şeht, bi çavekî û herwiha bi wê kalbûna xwe nedihişt teyr di ser konê min re bifire.

 

Carna ez diçûm Zarayê yan jî Sêwazê, dostê min ê wefakar, nola mihavizekî kon û şantiye dihefidand.

 

Êvarekê dîsa ez jî Zarayê vegeriyam şantiyeyê. Dost-birakê min bi nigê xwe yê kulek, licimî licimî û hat ez pêşwazî kirim. Min jî tomofîla xwe parq kir nekir, min ewil xwarina hevalê xwe dayê. Paşê ez li ser maseya xwe a sor rûniştim û min bi pistînî devê qutîka xwe ya bîrayê vekir. Haha nema, gavanê gund naxira xwe ji çêrê dianî dibir gund.

 

Çêlekên bi şîr, bi kubarî guhanên xwe yên hah a wanî hinkase ku bi zorkê di nava şeqên wan de hildihat, dihejand û dimeşiyan. Çêlekên stewr jî, nola lorgoskan bi raterqa çend cuwangeyên pîjik ketibû, dida lotikan û nola qîzkên azeb yên arpêketî, hiş di serê wan de nemabû. Hindik mabû xwe li kon û maseya li ber min biqewimandana.

 

Êde ez ji we re nabêjim, ez ji xwedê re dibêjim! Hingê ronî di çavê dostê min, di wî çavê ê bi tenê de nema; dîna min dît dostê min jihev vezeliya û xwe hupî li ser wan çêlekên bi rateqa cuwangeyên tolaz ketibû kir.

 

Wan çêlekên stewr û gewî, nizanîbû çi hat serê wan. Li hilobiyeke kovîyane xist û got xirp û terqiyan çûn.

 

Gavan jî bi devê xwe yê têde tije diranên koka wan zingarî bû, nola zarokekî fedyokî vekeniya…

 

Min navê dostê xwe kiribû Gurzo.

 

Riataza

Derheqa nivîskar da

RIATAZA

Malpera nûçeyan derheqa kurdan û Kurdistanê da; Ji bo malûmatîyên zêde berê xwe bidine vê navnîşanê: [email protected]

Qeydên dişibine hev