Şikoyê Hesen di dilê me da zindî ye

Şikoyê Hesen di dilê me da zindî ye

Em carek din helbestvanê xwe yê mezin bîr bînin

Amadekar: Ömer Faruk Feyat

 

¤¤¤

Na, ez hiz nakim soqaqa ker-lal,

Soqaqa mîna tendûra sik-sar,

Soqaqa mîna zenglê bê ziman,

Mîna çyaê rût bê çayîr-çîman…

 

Ew çi soqaq e, lê neê qûjîn,

Avto, maşîne lê nekin gujîn…

Û tê da neê dengê tifalê,

Dayîk nebeze û neçe balê…

 

Ew çi soqaq e, ku dar ker-lal bin,

Û dar, û kevir tê da pîr-kal bin…

 

Na… Ez hiz nakim soqaqa ker-lal,

Soqaqa mîna tendûra sik-sar.

Û bira kanî wir bike lîlîn,

Bira biqûje baê har û dîn,

 

Bira tê da bê qûjîna zurnê,

Bira bigere govenda dinê,

Bira bikenin wir bûk û zava,

T’eva muhbetê lê neçe ava…

 

Tê da bê dengê çivîka seme[1],

Kanî bibriqe mînanî qeme.

Darê dor xwe ra bikin galegal,

Û ew bibihên çîrokê delal…

 

Û ro birêse teşîya xwe zêrîn

Li ser sûretê kanînga zîvîn.

Lingê xwe bişon darê dêmhêşîn,

Û gulîê dara ba bigre bikşîn,

 

Û dar biwestin li devê cewê,

Şîrin û şîrin bikevin xewê,

Û bengîê wan be taê rihanê,

Û dinê hilde bîna piltanê…

 

Dar bivîn xewnê hikyat û zêrîn,

Û ji şabûna ew bikin qîrîn.

[1] seme: gêj, gêjik

 

TU MIN HIZKE…

 

Te hizdikim, te hizdikim, qîza qenc,

Ezî xortim, ez cahilim, ezî-genc.

Tu, ku têî, dimilmilî, dimeşî,

Sîûsê gulî, nav milê te, tîş-tîşî.

 

Tev bedewya dêmê nazik, xevxevê

Gerdenîê te diteîsin ber t’evê.

Tu çi kêfî, tu çi eşqî, tu-çi şa,

Dihingêvî, dihelînî dilhişa.

 

Gerden gazî, gula nazî, gula-nûr,

Ez nexweşim, ez serxweşim huba kûr.

Dêmê gulav, huba alav, huba dil

Ewqas şayîr, ewqas dengbêj û bilbil,

 

Hîştin sefîl, hîştin m’erûm, hîştin jar,

Birne gorê qîz û xortê bê pergal,

Çiqa bilbil, çiqa şarûr û dengbêj,

Ku bên-herin û derbaz bin, bibin kêş;

 

Tu yek wana, tu yek wana nikare,

Bi kilamê huba dinê xilaske:

Hub, ku heye, him okîane, him b’ere,

Ka sobekar, b’er-okîana meqeske?

 

Tu min hizke, tu min hizke, qîza qenc,

Ezî xortim, ez cahilim, ezî-genc;

Serî hube, serî dile, ez û tu,

Ku em şabin, bextewarbin tev hevdu…

 

Riataza

Derheqa nivîskar da

RIATAZA

Malpera nûçeyan derheqa kurdan û Kurdistanê da; Ji bo malûmatîyên zêde berê xwe bidine vê navnîşanê: [email protected]

Qeydên dişibine hev