NASNAVÊ ”MAMOSTE” JI KÊ RE TÊ GOTIN?

NASNAVÊ ”MAMOSTE” JI KÊ RE TÊ GOTIN?

Cansoz Dabo

 

Di van salên dawiyê de, peyva mamoste di nav civaka me ya Kurd de, nemaze li Rojavayê Kurdistanê, bi şêweyekî gelemper bi kar tê.

Ev peyv bi wateya «mielim» a Erebî yan «teacher» a Îngîlîzî tê bikaranîn û ji wir jî derbasî pir warên din bûye û ji pir kesan re wek nasnav tê bikaranîn.

Her wiha ji bo her du zayendan bi kar tînin.
Nêr: Mamosteyê min!
Mê: Mamosteya min!

Rojnamevan di hevpeyvînê de, ji mîvanê xwe re /çi siyasetmedar, çi kesên normal/ dibêje mamoste, mîvan jî bi mamoste bi nav dike, her wiha hunermend, parêzer, nivîskar …hwd.

Gelo ev têrm di cihê xwe yê rast de tê bikaranîn?

Ez ê hewl bidim li jêr bi şêweyekî rêzimanî û li gor wateya wê ya rast şirove bikim.

Di warê rêzimanî de, biwêja mamoste çêkirî/hevdudanî ye, ango ji du bêjeyan pêk tê, mamo û hoste/oste.

Dema gotina hevdudanî ji hev cuda û sade tê nivîsandin, gotina pêşî veqetandekê distîne û ya dawî mîna xwe dimîne.
Wek: Mamoyê oste/mamoyê oste yê min!

Lê dema bi hev de/hevdudanî tên nivîsandin, gotineke nû çê dikin û veqetandek li dawiya gotina nû tê nivîsandin.

Wek: Mamo+oste= Mamoste= Mamosteyê min!

Bêjeya «teacher» a Îngîlîzî yan «mielim» a Erebî ya ji dêvla wê mamoste tê bikaranîn, bi Kurdî hînker/fêrker/hoker yan perwerdeker e, her çar bêje hevzayend/duzayend in û tîpa «k» nerm tê bilêvkirin.

Mam/ap ji birayê bavê mirov re tê gotin û gelek caran dema Kurd rêzê didin mirovekî navsalî yan jî xebatkarekî navdar, jê re dibêjin mamo yan apo!
Nimûne: Apo Osman Sebrî, Mam Celal û …hwd.

Oste/hoste jî nasnavekî pîşeyê ye, ji kesê ku lêkirin yan avakirina xaniyan dike re tê gotin, Loma jî dema kesekî zêde zana be yan di karekî xwe de şareza û pispor be, jê re oste tê gotin, mebest jê ew kes bi zanebûn lê dike yan dirame û tiştekî pilan dike.

Peyva mamoste bi her du şêweyan «hevdudanî yan du gotinên xwerû» zayenda nêr distîne, heger peyv ji hev cuda bin/xwerû bin, mamo zayendê distîne, yan jî hevdudanî be «mamoste», dîsa peyva sereke zayendê distîne, di vê rewşê de mamo sereke ye û zayenda xwe ya normal distîne. Li gor van şiroveyan çê nabe mirov ji jinan re bibêje mamomste, çimkî mamo/apo tenê ji mêran re tê gotin.

Dema mirov ji yekî re dibêje mamoste, mirov rêzdariyê dide wî û bi mamê zana/pispor, ne mirovê fêrkirinê dike, dide nasîn.

Têkliya mamoste bi hînkirinê tune û ji her kesî re nayê gotin.

 

Riataza

Derheqa nivîskar da

RIATAZA

Malpera nûçeyan derheqa kurdan û Kurdistanê da; Ji bo malûmatîyên zêde berê xwe bidine vê navnîşanê: [email protected]

Qeydên dişibine hev