Pirsa we û bersîva me – 177

Pirsa we û bersîva me – 177

Xwendevanên delal, wek hûn dibînin malpera me beşa xwe a bi sernavê ”Pirsa we û bersîva me” bi serketî bi rê va dibe. Rêvebira wê beşê nivîskara malpera me Nura Şane ye. Hemû pirsên ku redaksyonê ra têne şandin, em ji Nura delal ra dişînin û ew an bi xwe, an jî bi alîkarîya redaksyona malpera me bersîva pirsên we bide.

Xwendevaneke me pirsa wê yekê dike, ka bo çi çend  gotinên pêşîyan hene ku hevdu înkar dikin û hîvî dike em çend nimûneyan bînin û şirove bikin ka bo çi ferq hene.

Rêvebira beşa ”Pirsên we û bersîvên me” Nura Şane bersîvên bêhempa dîtine. Emê pirs û bersîvekê  îro çap bikin, lê pirs û bersîveke din tam piştî heftêyekê çap bikin.

Kerem bikin!

 

Pirsa Jîndaya Cemal û bersîvên Nura Şane -1

 

Pirs:Gelo hûn dikarin nimûneyên gotinên pêşîyan bêjin, ku hevdu înkar dikin, an jî ser eynî pirsê şirovekirinên cuda, tam dijî hevdu hebin?

 

Bersîv -1: – Gotineke pêşîyan dibêje: “Dê bibîne, dotê ber hilîne”. Ango dê çi be, keça wê jî kêm-zêde wê eynî be. Gotineke pêşîyan a din dibêje: “Ji dê û bavan hezar tule dikevin”. Ango dikare di navbera dê û bavê û zarokên wan da ferqên bi her awahî hebin.

 

Di van gotinên pêşîyan da dijberî tune, tenê gotineke pêşîyan gerek di rewşekê da bi kar bînin, lê a din di rewşeke din da. Mesele, “Dê bibîne, dotê ber hilîne” dixweze bêje, ku keça dayîkê dikare di hêla xwerinçêkirinê, paqijaya malê, pêşwazîkirina mêvanan, namûsê û h.w.d. da çav bide dayka xwe, her tişt wek wê bike, ji ber ku çi ji diya xwe dîtîye, jê hîn bûye.

 

Bersîv -2: – Em bên ser gotina pêşîyan a “Ji dê û bavan hezar tule dikevin”. Li vir zêde ferqa nifşan xuya dibe. Mesele, dê û bav nexwendî ne, kurdîya wan baş e, folklora xwe rind zanin, gorî erf û edetên gel dimeşin, wergirtina wan (ango kincxwekirina wan) yên miletîyê ne, ango şal û şapik, xeftan û kofî û h.w.d. bi kar tînin. Lê zarokên wan yên ji nifşa dû wan ra xwendî ne, di rûyê fêrbûna zimanên din da kurdîya wan zêde ne baş e, bi sebebê ku zêde têlêvîzyonên biyanî mêze dikin û bi têlêfona destan dikevine Internetê û zêde tiştên dûrî civaka me mêze dikin, ji folklora me û erf û edetên me dûr dikevin, kincên nûjen û gorî demê li xwe dikin, wê demê ferqa nifşa dê û bavê û nifşa zarokan zelal tê ber çavan.

 

Lê dikare ferq di navbera zarokên dê û bavekî da jî hebin. Çend zarokên wan li gund li rex dê û bavê xwe mane û bi gelek hereketên xwe va, parastina erf û edetên gelêrî va zêde dişibine dê û bavê, lê zarokên eynî dê û bavê, ku ji gund derketine, xwendine, ji her tiştên miletîyê dûr ketine, dikarin qet neşibine dê û bavê xwe, heta xûşk û birayên xwe yên di gund da mane jî. Mixabin, hinek caran ew ferq di vexwerina alkoholê, di namûsê da jî xuya dibe.

 

¤¤¤

Lê pêşketin û xwendina zêde ne herdem e ku tê maneya tu ji kesên pêşneketî û nexwende bi aqiltir û zanetir î.

 

Riataza

Derheqa nivîskar da

Nura Şane

Nura Şane 2 zanîngeh temam kirine, yek a Zanyarîya Tundurustîyê, a din jî a Dadmendîyê, niha di nexweşxaneyeke biyanî da li Stembolê kar dike. Nivîsên wê bi taybetmendîyên naveroka xwe, bi zimanê kurmancî yê dewlemend va wê ji hemû nivîskarên kurd, xwesma nivîskarên jin, cuda dike û gelek kes dixwezin çav bidine wê.

Qeydên dişibine hev

Bersîvekê binivîse

Your email address will not be published. Required fields are marked *