WERGER, TRANSFÊRA ZANÎNÊ YE

WERGER, TRANSFÊRA ZANÎNÊ YE

Nivîskarê malpera me bijîşk e, nivîskar e, wergervan e.

 Û di vê nivîsa wî da jî nivîskarî, wergêrî û derûnîya bizîşkî

 bi awayekî bêhempa bi hevdu va hatine hûnandin û kemilandin.

Husên Duzen

 

Di dîroka-hema hema-tevahiya dewletên dunyayê de salên wergerê hene. Di salên destpêkê yên dewletên ciwan de bi dorfirehî li ser wergerê hûrbûnek pêk tê. Ev yek bi taybetî li wan welatên ku desthilatdarên wan xwedî îdîayên mezin in pêk tê. Kî dewleteke nû ava bike, ew dizane ku pêdiviya wê bi ezmûnên welatên din heye. Ji bo ku transfêra zanînê ji deverên din bibe, pîkoliyeke dorfireh pêwist e; bi keda hesên yekoyek karekî wisa nikare pêk bê.

Gelo li ser Axa Azad çi pîkolî hene, ez nizanim. Bi min wisa tê ku tu xebatên berbiçav tunene. Ger ev gumana min rast be, îdîayeke wan î mezin ji bo dahatû jî tune ye. Kî bixwaze bi serkeve divê hay ji azmûnên berî xwe, ji yên deverên din hebe.

Dema ku bahsa wergerê dibe, tenê wergera wêjeyî tê bîra me. Ligel ku ew zehf girîng e jî siyaseta wergerê nikare xwe bi wê tenê bisînor bike. Wergera ji tevahiya disiplînên zanistê ji bo kurdan jî pêwist e, ger ew bixwazin kabê xwe bavêjin nav ên gelên dunyayê.

Ez gelek caran dibim şahidê xeydokiya ciwanan. Ez dibînim bê qadroyê siyasî bi çi zimanekî tund hevdu rexne dikin. Ez dibînim ku yek ji serekekî re peyveke ne li gor hesabê wî bibêje, dikare bibe sedemê kuştina wî kesî. Di van hemû kirinan de pergalek heye, ku bi teşeyên cûda derdikeve pêşberî me. Dibe ku xwendekarekî derûnînasiyê navê „personality disorder“ li van reaksiyonên li dijî rexneyê bikira.

Ez dizanim ku hûn niha dibêjin ew çi ye? Belê, ger werger li welatê me bi dorfirehî pêk hatiba, me dê zanîba bê mebest bi vê têgehê çi ye. Dibe ku mirov jê re bibêje „Xerabûna Kesayetê“. Gelo ev wergereke baş e? Ez jî nizanim. Ger min wergeranda, kêmzêde minê wisa wergeranda.

Nebêjin ma xerabûna kesayetê heye? Erê heye. Û ne yek dudu tenê ne, bi kêmanî ez 8 cûreyan jê nasdikim: Paranoîd, şîzoîd, disosyal, hestên ne qewî, hîstronîk, anankastîk, tirsonek, narzist. Ev hemû şêweyên xerabûna mêzêna derûna kesayetiya mirovan ên cûda ne. Qederê ez dizanim hemû di xalekê de dighêjin hev: Hemû jî nikarin rexneyê hilînin. Her ku ez li kesên henûn rast têm ku piştî rexneyeke biçûk ji eyarê xwe derdikevin, an jî her ku ez li wê hejmara mezin a ji kesên xeyidî dihizirim, ev têgeh tê bîra min.

Ger em ji dêvla bi transfêra zanîn û azmûnan bi berdewamkirina kevneşopiyên xwe mijûl bibin, dikare buhayê wê zehf giran be. Ma tevahiya dîroka me ji me re nabêje, divê ev xeleka ku bi sedsalan xwe dubare dike bê şkandin?

Ji bo van hemû tiştan rexne divê. Ji bo ku rexne karibe bê kirin, divê têgeha „personality disorder“ bê famkirin. Ji bo van hemiyan jî xwendin û zanîn divê.

Berî her tiştî jî werger divê.

Riataza

Derheqa nivîskar da

Husên DuZen

Wek bijişk di beşa norolojî de kar dike. Di ber re jî wergerên wêjeyî dike. Berî fakulteya bizîşkîyê bixwîne, fakulteya aborî jî qedandibû.

Qeydên dişibine hev