Hewildan an zêhniyetên xeternaktirîn

Hewildan an zêhniyetên xeternaktirîn

Şemsettin Işıklı

 

1- Piraniya siyasetmedar û qaşo rewşenbîrên kurd dibêjin; ji bo ku em bigihîjne girseyê, ji bo ku em dengê xwe berbelavtir bikin, em zimanê tirkî tercih dikin. Ev îlankirina îflasê ye.

Yanê girse ewqas ji te dûr ketiye û tu jî ewqas ji girseya xwe dûr mayî, tenê li ber te ew rê ye ku tu bi zimanê jenosîdkarê xwe, bi saziyeke dagirkeriyê bikarî bigihêjî girseya xwe.

 

Ev rê xitimandiye, ev rê bi tu awayî te nabe ber bi serkeftinê ve. Tecrûbeya vî pêncî saliyê dawîn li meydanê ye. Bê guman ku armanca te serkeftin be.

 

Tu tenê ji xwe re bahane çêdikî ku tu, tu karî nekî. Loma jixwe kar û barê siyasî û rewşenbîrî ew e ku li rêyên çareseriyê bigere û peyda bike. Dê tu bi xwe û bi zimanê xwe ji xwe re girse peyda bikî. Jixwe girse heye lê rêya gihîştina wê girseyê ne zimanê tirkî ye.

 

2- Hinek ji me jî derketine qaşo dê ji bo zimanê kurdî xizmet bikin lê zimanê wan yê sereke dîsa tirkî ye. Bahaneya wan dîsa ew e ku dixwazin bigihîjne girseyeke berfireh.

 

Naxêr, heke zimanê we yê sereke tirkî be, ev dê bibe xizmet ji bo zimanê tirkî. Ji bo zimanê kurdî hemû xizmet, bi her awayî hewildan pîroz in. Lê pîvana sereke ew e ku ew xebat hemû bi zimanê kurdî bên kirin.

 

Di van şertan de xizmeta ji bo ziman ewqas ne erzan û ne hêsan e.

 

Xizmetkirina ji bo zimanê kurdî semîmiyeteke bêpîvan, kedeke jidil û dilekî xwebexşîn divê.

Bahaneya ”gihîştina girseyeke berfireh” xapandin e, xwexapandin e û rê li ber pêvajoya asîmîlasyonê xweşkirin e.

 

Ji nû de, gav bi gav, bi biryar û îstiqrar, bi dil û can, bi têkoşîneke şoreşgerî ber bi asoyeke serxwebûnxwaz ve!

 

Wêne: Yaqûb Kurmanc

 

Riataza

Derheqa nivîskar da

RIATAZA

Malpera nûçeyan derheqa kurdan û Kurdistanê da; Ji bo malûmatîyên zêde berê xwe bidine vê navnîşanê: [email protected]

Qeydên dişibine hev