Memê Miksî di bin tesîra berhemeke Xelîlê Çaçan da

Memê Miksî di bin tesîra berhemeke Xelîlê Çaçan da

Wisa xuya ye ku yekîtî û hevgirtina di nava miletê me da ne bi siloganan çê dibin, ne bi rêklaman, ne bi karên rêxistinên sîyasî, lê bi kalîteya zanebûnan û welatparêzîya rasteqîn va çê dibin. Nivîskarekî Ermenîstanê Xelîlê Çaçan berî ku helbestvanekî Bakurê welatê me Memê Miksî ji diya xwe bibe, berhemeke folklorî veçêkirîye û çap kirîye û ew berhem dilê Memê hingavtîye û wî ruhekî nû daye berhemê. Ango, eva gavek e bo di hêla edebî da nêzîkîhevbûna kurdan, ew nêzîkîhevbûn jî welatparêzîyê xurttir dike, ew welatparêzî jî serxwebûna Kurdistanê nêzîk dike.

Ev helwesta helbestvanê genc îzbatek e, ku hinek qaşo helbestvan û nivîskar ku dimirin, berhemên wan jî bi wan ra dimirin. Lê berhemên helbestvan û nivîskarên rasteqîn piştî mirina wan jî dijîn û bi wan berhemên wan va ew jî zindî dibin.

Di dem û dewranên Ahmedê Xanî û Melayê Cizîrî da jî helbestvan û nivîskar hebûn. Lê dema ew mirin, berhemên wan jî bi wan ra mirin.

 

Memê Miksî

WEXTÊ TIFAQ HEBE

Li gor gotina

Hinek pêşiyan

Mezinê malek

Ji dest da jiyan

Maliyan ji bo

Malxwêyekî nû

Civînek danîn

Ne direng bi zû

Nedinêrîn li

Temen û ‘imir

Ne jî li qamek

Hûrik û an gir

Û nedibû bi

Zora zend û mil

Dibû serwesî

Yê zehf biaqil

Ji ber vê yekê

Wan bi dil û can

Ev şan û paye

Dan birê Rizgan

Rizgan biçûkê

Van heft biran bû

Niha jî li ber

Barek giran bû

Rizgan got: Min ev

Nedixwest yeqîn

Ey ezîzên pir

Pak û dilovîn

Madem we îro

Da min ev şeref

Ca em bigehin

Armanc û hedef

Du şertên min jî

Hene bêguman

Ger nebin qebûl

Ez ê tu deman

Mezinahiya

Evê malbatê

Ji we ra nekim

Wê heta hetê

Yek dê qelpî û

Hem sextekarî

Di gel we nebit

Heval tu carî

Ya din derziyek

Kes nede kesê

Heta ku ji min

Hûn nekin pirsê

Soz dane Rizgan

Maliyan bi tev

Pêk bînin ya ku

Derketî ji dev

Rizgan di nava

Mirovên malê

Tifeqek wisa

Çêkir wê salê

Rizq û nesîbê

Wan pir bû gelek

Hem di derî ra

Dihat hem kulek

Cêwî dianîn

Çêlek û mangan

Çend qat ji berî

Zêde şîr didan

Mih û bizin jî

Salê du caran

Vala dibûn ji

Berxik û karan

Ta bigre hêkên

Mirîşkên li tar

Nedişkestin qet

Ku diketin xwar

Heta demekê

Didome wiha

Tev birûken in

Dev li bin guha

Rojekê Rizgan

Her wekî berî

Vekir li gova

Dewaran derî

Dikir afiran

Dagir ji kayê

Lê çi ji nêşkê

Bala xwe dayê

Ji ser tar çend hêk

Jor da ketine

Li erdê zer in

Temam şkestine

Rizgano gez kir

Ew lêva jêrê

Got: Ev naşibe

Nîşana xêrê

Xweş nehat bi min

Ev dêmen û hal

Bêtifaqiyek

Ketiye di mal

Rizgan ji govê

Derket wê hînê

Ca alif bîne

Ber da kadînê

Dît li ser berfê

Dewsa sê kesan

Ji malê çûne

Wisa bi hêsan

Ma şaş û metel

Bi evê rewşê

Got: Evê sibê

Ferdek ji hewşê

Ji bilê min hêj

Derneketiye

Ka bişopînim

Mesele çi ye

Çûbûn kadînê

Xwediyên dewsan

Rizgan lê nêrî

Vayê sê insan

Biçûk in wekî

Zarokên sava

Got: Çi kesin hûn?

Bêjin malava

Yekî jê ra got:

Ji mala we em

Xeyidîn hatin

Gelek bi dilxem

Bêtifaqiyek

Nû bûye peyda

Me jî ji ber vê

Dev ji we berda

Yek ji me tifaq

Yek jî dewlet e

Yê din jî aqil

Pir birûmet e

Rizgan kete bi

Hêvî û lavan

Got: Bizivirin

Qurbana çavan

Her sê li rûyê

Hevdu dinêrin

Aqil dibêjit:

Em tev bikêr in

Ji me tu kîjan

Bixwazî dê yek

Di gel te bêtin

Xortê çavbelek

Rizgan li ser vê

Hin difikire

Dibê niha ez

Aqil ji xwe re

Hekî bijêrim

Nabe bê dewlet

Biryar giring e

Min navê xelet

Dewlet bixwazim

Ku nebe tifaq

Dê em bilav bin

Bi saya nifaq

Lê yekîtiyek

Çêbitin eger

Me çi bivêtin

Wê hebit bawer

Û got ji wan ra:

Ya bo min lazim

Ji we her sêyan

Tifaq dixwazim

Diyar bû ewî

Tiştek dizanî

Lew dema tifaq

Di gel xwe anî

Dane li pey wan

Dewlet û aqil

Li malê cih bûn

Eyn mîna ewil

Rizgan kir gazî

Malî hatin lik

Got: Yekî qelpî

Kiriye bê şik

Jinbirayekê

Bi dengek nizim

Got: Ya qal dikî

Bi rastî ez im

Min pehtinek ard

Ji te bêxeber

Da wê cîrana

Bi nav Gulîzer

Tobe be êdî

Bêyî te tiştek

Nedime kesî

Heta benîştek

Li pey gotin û

Sozê vê jinê

Dîsa bereket

Heyiya dinê

Bû rehmet li ser

Ewan da barî

Hingî ku dom kir

Şêwr û hevkarî.

 

Çavkanî: berhemeke Xelîlê Çaçan

 

Riataza

 

Derheqa nivîskar da

RIATAZA

Malpera nûçeyan derheqa kurdan û Kurdistanê da; Ji bo malûmatîyên zêde berê xwe bidine vê navnîşanê: [email protected]

Qeydên dişibine hev