Pirsa we û bersîva me – 179

Pirsa we û bersîva me – 179

Xwendevanên delal, wek hûn dibînin malpera me beşa xwe a bi sernavê ”Pirsa we û bersîva me” bi serketî bi rê va dibe. Rêvebira wê beşê nivîskara malpera me Nura Şane ye. Hemû pirsên ku redaksyonê ra têne şandin, em ji Nura delal ra dişînin û ew an bi xwe, an jî bi alîkarîya redaksyona malpera me bersîva pirsên we bide.

Emê çend heftêyan cûrê pirskirin û bersîvdanê biguhêrin. Ne ku wê xwendevan pirsan bikin û emê bersîvan bide, lê Nura Şane wê pirsan li zimanhezekî me Qasimê Xelîlî bike, hemû jî pirsên derbarê zimanê kurdî da. Bo pêkanîna vî karê pîroz di navbera malpera me û Qasimê Xelîlî da lihevkirinek heye.

 

Pirsa Nura Şane û bersîva Qasimê Xelîlî

 

Pirs: Gelo tu dikarî behsa “Rastnivîsîna Cihnavên Xwedîtîyê” bikî?

 

Bersîv:Veqetandek (qertafên îzafeyê) dema bi serê xwe bin, navê wan CIHNAVÊN XWEDÎTÎYÊ ye. Cihnavên Xwedîtîyê ev in:

 

1- A : yekhejmar mê

2- Ê : yekhejmar nêr

3- ÊN : pirhejmar

 

mînak:

hevala min A hêja

hevalê min Ê hêja

hevalên min ÊN hêja

 

RASTNIVÎSÎNA WAN ÇAWA YE?

 

Peyva berîya wan bi dengdêrekê biqede cihnavên xwedîtîyê dengê “Y”yê digirine ser xwe. Bi dengdarekê biqede bê “Y”yê têne nivîsandin.

 

mînak: 

hevala Fatê YA hêja

hevalê Fatê YÊ hêja

hevalên Fatê YÊN hêja

hevala Qasim A hêja

hevalê Qasim Ê hêja

hevalên Qasim ÊN hêja

 

Heke weke van mînakên jorîn ne di dewama ravekeke zincîrî de bin; hingî mirov bi dilê xwe ye, ne şert e mirov li herfa dawî ya peyva berî van cihnavan binêre.

 

mînak:

 

Va ye ez li vir im, YÊ dizane ji xwe dizane.

Va ye ez li vir im, Ê dizane ji xwe dizane.

Ev, A te ye?

Ev, Ya te ye?

Ez dizanim, YÊN tirş xweştir in.

Ez dizanim, ÊN tirş xweştir in.

Ev mînak tev jî rast in. 

Riataza

Derheqa nivîskar da

Nura Şane

Nura Şane 2 zanîngeh temam kirine, yek a Zanyarîya Tundurustîyê, a din jî a Dadmendîyê, niha di nexweşxaneyeke biyanî da li Stembolê kar dike. Nivîsên wê bi taybetmendîyên naveroka xwe, bi zimanê kurmancî yê dewlemend va wê ji hemû nivîskarên kurd, xwesma nivîskarên jin, cuda dike û gelek kes dixwezin çav bidine wê.

Qeydên dişibine hev