DERGÛŞAN MEKUJIN

DERGÛŞAN MEKUJIN

Raif Yaman 

Ez dergûşek piçûk im

Sê sal e ez mirî me

Şeş mehî bûm li Halepçê

Hatin kuştin bi kîmyayê

Min fam nekir

Çima ez hatim kuştin

Hêlkanek min hebû

Dîya min li ba dikir

Ez dergûşek şeş mehî me

Mezin nabin dergûşên mirî

Mekujin dergûşan

Mekujin bira mezin bibin

Bira şîr jî vebixwin

Aş bikin dergûşan mekujin

Şeva înîyê ez têm malên we

Hûn min nabînin

Xwîya nabin dergûşên mirî

Êdî dergûşan mekujin

Bira şîr jî vebixwin

Şîrê spîyê dîya xwe

Tirba min pir sar e

Yek caran dibim nîvana we

Li ber soba we xwe germ dikim

Car caran digrîm jî

Lê dengê min nahê we

Ez dipêm yek destê xwe biavêje min

Yek min bixe hemêza xwe

Dernakeve dengê dergûşên mirî

Car car dikevim nav zarên we

Bi wan ra dikenim  dillîzim

Dixwazim ji zaran yek

Gumên min maçî bike

Min tenê diêlin û dierin

Tê bîra min kes min nabîne

Rojên jîyanê ne weha bûn

Brakî min hebû

Kulîlk danî dida min

Bi min ra mijûl dibû

Gava ez dikenîyam

Kêfa wî dihat

Gava ez digrîyam

Ba dîya min dikir digot;

“Dayê pitik şîr dixwaze”

Bes e êdî dergûşan mekujin

Fermanên nû ramekin

Dayîkên me ji me mekin

Ez dergûşek şeş mehî me

Sê sal heye ez kuştî  me

Mezin nabin dergûşên mirî

Yek caran digerim

Dierim nav baxçan

Dikevim nav baxçên Halepçê

Mêzedikim her kes meywekî dixwe

Dilê min jî dierê

Dixwazim habek tirî bixwim

Sêvekê gez bikim

Tew nikanim tiştekî bixwim

Tişt naxwin dergûşên mirî

Ez degûşek şeş mehî me

Li Halepçê şehîd bûme

Sê sal heye ez kuştî me

Ez dergûşek şeş mehî

Mezin nabin dergûşên kuştî

 

16 Mard 1991, Enqere

Derkenar: Ev hozana min di 29.05.2020 da ji ber destnivîsa hevalê min ê hêja Ali Coşkun bi kurmancîya kêm-zêde standard a îro ji nû ve hatîye nivîstin. Li hindik gundên Erxenî ji pitan ra dergûş jî tê gotin…

 

Wêne: Rebwer K Tahir

 

Riataza

Derheqa nivîskar da

Raif Yaman

Raif Yaman ji Diyarbekirê ye. Li Universita Enqerê Filologiya Fransizî xwendiye. Li Universita Artuklu ya Mêrdînê li ser ziman û cultura kurdî master kirîye. Du kitêbên hozanan û gelek nivîsên edebî, linguistic û politic nivîsîne. Bi kurdî, turkî, fransizî, îngilîzî û almanî dizane. Bengîyê zar û zimanê kurdî ye…

Qeydên dişibine hev