Dengbêjê navdar Paşayê Efo û stirana “Xwazil dîsa zar bûma”

Dengbêjê navdar Paşayê Efo û stirana “Xwazil dîsa zar bûma”

Gelo helbesta profêsor Sehîdê Îbo kê kirîye stiran?

Aslîka Qadir, dengbêj / hunermend

 

Gelo hun zanin, awazê stirana “Xwazil dîsa zar buma”, kê sêwirandîye? De naha bixwînin.
Hunermendê meyî hizkirî, yê bi merîfeta mezin Paşayê Efo, ku naha, mala Xwedê ava, genc e û di jîyanê da ye, min ra ev serpêhatî ronî kir.

Gava ew zarok bûye, tim tevî bavê xwe ji gundê Qibixtepe, ya nehîya Telînê li Ermenîstanê, hatiye Rewanê û serî li radyoya kurdî daye. Radyo bibû mala rasthatinên ronakbîrên kurd, li wir wana fikir û ramanên xwe, pêşnîyarên xwe dadanîn ser masê û li hev dişêwirîn.

Paşa hê zaroktiya xwe da evîndarê çand û hunera kurdî buye. Digot, rojên yekşeman (le`dê) tim stiran bi xasteka radyoguhdaran bi radyoyê diweşandin û ewî pir ji stirana “Welatê me Kurdistan e” hiz kiriye, loma ji bavê xwe hîvî kiriye, wekî ew gotinên stiranê jêra ber radyoyê binivîse. Bavê wî pê ra nagihîne  gotinên stiranê carekê va ber binivîse û ew dibe sebeb, ku Paşa xwe pir aciz dike û dest bi girînê dike, belê, şewat-şewat digirî. Bavê wî destê xwe serê kurê xwe ra dibe, ber dilê wî da tê û dibêjê : -Kurê min, negirî, wê le`da tê dîsa vê stiranê bidin û çi ku min pêra negihand binivîsim, ezê bînim sêrî.

Sal derbas dibin, Paşa dibe xort û hizkirina wî himber stiranê jî, pêra hê mezin dibe. Paşa stiranan bi xwe dinivîse, miqamê wan datîne ser û bi xwe jî dıstirê. Mînak, stirana “Usa menêr, usa menêr tu li mın”, ku stiranek pir hîzkirî û delal e. Her waha sê stiranên din jî pêra.

 

Bi vî teherî Paşayê me tê naskirinê wek awazdanerekî jêhatî. Carekê jî, wek her caran, ew dîsa gel bavê xwe diçe radyoyê, rêvebirê wê, rehmetiyê Xelîlê Çaçan bûye, dinêre wê profêsorê me Sihîdê Îbo, Egîtê Cimo û Aramê Tîgran jî li wir in. Sihîdê Îbo helbesta xwe “Xwezil dîsa zar bûma” dide Paşayê Efo û dibêjê : -Kerem ke, vê helbesta min bike stiran.

 

Ew helbestê dike stiran û gava dixwaze îdî tomar bike, tevî sê stiranên xwe yên mayîn, Aramê Tîgran nêzîkî wî dibe û dibêjê : -Binêre, ez bi dengê te ra cimbûşê lê didim, stiranên te pir kêfa min tînin, tu jî stiraneke xwe bide min.
Paşa jî hema stirana “Xwazil dîsa zar bûma” amadekirî dide Aramê Tîgran.

 

P.S.

Versyoneke nivîsara helbesta vê stiranê ha ye:

Du bizîşkên me yên navdar Sehîdê Îbo û Simoyê Şemo hevalên hev bûn. Rojekê bi hev ra di rê da diçin, dibînin ku di rê da zarokên pêxas, lêvên wan terikî di nava xwelîyê da dilîzin, wê demê zarotîya wan dikeve bîra wan û biryar dikin helbestekê ser zarotîya xwe binivîsin. Her yek ji wana versyona xwe dinivîse, herdu jî bi naveroka xwe dişibine hev. Helbesta Simoyê Şemoyê rehmetî di berevokeke wî ya helbestan da çap bûye, ya Sehîdê Îbo di berevoka wî a helbestan da.

 

Riataza

Derheqa nivîskar da

RIATAZA

Malpera nûçeyan derheqa kurdan û Kurdistanê da; Ji bo malûmatîyên zêde berê xwe bidine vê navnîşanê: [email protected]

Qeydên dişibine hev