Çendî pêdiviya me bi bijîjkên wek Dr. Ciwan Hemê heye

Çendî pêdiviya me bi bijîjkên wek Dr. Ciwan Hemê heye

Konê Reş

 

Piştî ku min navê Dr. Ciwan Hemê ji xelkên Qamişlo û penaberên Efrînê bihîst ku ew wek textorekî kurd ji Swêdê hatiye û xwe ji qenckirin û çareseriya birîndarên kurd re ku di şerên Daiş û hêzên tarî de birîndar dibin, vala kiriye.

 

Min xwest bêtir wî nas bikim. Erê, piştî ku min da ser şopa wî, min naskir ku ew ji gundekî ji gundên Beriya Mêrdînê ye, kurê welatparêzekî kurd e, xwendina xwe di bijîjkiyê de, bi pileyeke zor baş standiye û ji çend salan ve jiyana xwe li Swêdê derbas dike.

 

Belê piştî êrîşên Daişê û hêzên tarî ku malwêranî anîn ser herêmên Kurdan, Dr. Ciwan Hemê, Swêd li pişt xwe hişt û vegeriya nav welatiyên xwe Qamişlo. Ji erkê xwe dît ku di rewşa wiha de li kêleka welatiyên xwe be û birîndarên wan bi zanîbûna xwe derman bike.

 

Di encamê de, di germbûna şerê Daişê û hevalbendên tirkan de wî rojên zor dijwar derbas kirin; li kêleka şervanên Efrînê, Kobanîyê û piraniya cihên ku şer li wan li dar bû, amade bû û bi sedan û hezaran operasyon ji birîndaran re çêkirin. Vajî wî, bi dehan ji bijîjkên me çûn Ewropayê. Ew rûmet û deyaxa Dr. Ciwan Hemê li cem wan nebû ku di nav welatiyên xwe de bimînin û roja îro, gelek bijîjkên xerîb ketine şûna wan de.

 

Di vê derbarê de, Dr. Ciwan Hemê ew çend bijîjkên Kurd yên pêşeng anîn bîra min: Dr. Ehmed Nafiz Beg Zaza yê ku navê wî tu carî nayê jibîrkirin. Ew ji bijîjkên pêşî bû di warê dermankirina xelkê Cizîrê de. Di wî heyamê dûr de Dr. Nafiz xwe li xelkê Cizîrê girt û bi hezaran ji xizan û belengazan, ji destê nexweşîyên wek: Sorik, Xwirî, Tawî, Melarya û êşa zirav parastin. Her roj bi dehan zikqelaştin ji nexweşan re çêdikir, tevî ku zikqelaştin ne ji karê wî yê bijîjkî bû, belê ji neçarî bi wî karî jî radibû û destê wî ji welatiyên Cizîrê nebû ku careke din vegere Şamê û di kilînîka xwe de li taxa Ernûsê bimîne.

 

Di pey wî re, du bijîjkên din serê xwe di nav xelkên Cizîrê de bilind kirin, wan jî da ser şopa Dr. Nafiz. Ew jî ev bûn: Dr. Qasim Miqdad Cemîl paşa Diyarbekirî (di 13.10.1992an de li Qamişlo çûye ber dilovanîya Xwedê) û Dr. Dara Arif Beg Abbas bû. Van her sê doktoran, tevaya hêza xwe berdan ser saxlemî û rehetkirina can û bedenên xelkê Cizîrê bi tev nijad û netewên ku tê de dijîn, ji Kurd, Ereb, Ermen û Siryan ve.

 

Roja îro, ez Dr. Ciwan Hemê wek nimûneyekê ji wan doktoran dibînim. Ne ku min Dr. Ciwan tenê wek texrorekî bi rûmet û welathez naskir, belê min ew di warê mirovahî û mirovheziyê de jî xwedî wijdan û bawerî dît. Berî salekê di gerimbûna şerê Ermeniyan û Ezirbêcaniyan de wî ji Ermeniyan xwest ku wek textorekî Kurd here Ermenistanê li kêleka şervanên Ermeniyan bisekine û birîndarên wan derman bike. Piştî ku Ermeniyan daxwaza wî di nav xwe de giftûgo kirin, spasnameyek germ jê re şandin.

 

Hem jî, Dr. Ciwan ne dûrî tore û wêjeyê ye. Di piraniya çalakiyên rewşenbîrî û wêjeyî de amade dibe û baş bi zimanê Erebî dinivîsîne, bi hêvî me ku wiha jî, bi zimanê kurdî jî binivîsîne. Her wiha ew bi zimanê Înglîzî û Fransî jî baş zane. Dawî dibêjim; Çendî pêdiviya me bi bijîjkên wek Dr. Ciwan Hemê heye. Xwedê kesên wek wî di nav me de pir bike.

 

P.S. Mixabin, ku demekê piştî vê gotara nivîskar Konê Reş bijîjkê navdar dr. Ciwan Hemê ji nava me bar kir û çû ser dilovanîya Xwedê.

 

Riataza

Derheqa nivîskar da

RIATAZA

Malpera nûçeyan derheqa kurdan û Kurdistanê da; Ji bo malûmatîyên zêde berê xwe bidine vê navnîşanê: [email protected]

Qeydên dişibine hev