Berfa Pampê...

Xaylaza Reşîd

Êvar da berf usa dibarî, derî-bacî tev dihatine girtinê. Kurşê davîte çokê, cînar nediçû mala cînêr. Dibû vizîniya bagerê, gufe-gufa bê bû, berf davîte sivderê, merîya nikaribû derî vekira hema heta ber lodê here, ku debarê bîne mal û mûl alif ke.

Bagerên Axbaranê, meriv rast bêje, bagerne zor bûn, sur û serma, zivistana me dirêj bû. De roj zanibû, carna bagerê sist dikir, bagerê vedikir, qîz û bûka didane dewl û qeyntera, diçûne ser qunîyê avê bînin.

Qunîya me berjêr diket, ji ber ku mala me ser tilm bû, gere tu jorda daketayî newalê. Dayîka min e rehmetî, ser berfê «pêpeling» çê dikir, ser «pêpelingê» û dora qunîyê xwelîya tendûrê direşand, wekî ser bûzê neşimitin, neşqitine qunîyê.

Hema hinekî bagerê sist bikra, me zara xwe davîte nava berfê û dilîst. Me topê berfê davîtine hev, kalê berfê çêdikir. Ew hela hindik bû, ne axir em gere rabûna ser xanî jî. Hildikşiyan û me ji ser xanî banz dida nava berfê. Me têr dilîst, wextê lîstikê me tê dernedixist, em çawa qerimîne û em, wek dibêjin, bûne dar.

Dayîka min e rehmetî jêlava ji xênî dikire gazî, dengê wê kulekê ra dihate me: – qîzê bese banzde, te xanî tap kir, belqitîyê, tuyê usa banzdî, ku bazinê ustîyê xwe bişkênî, peyabe, were malê, tê kulekê da bikevî…

Îja kê ra dibêjî?! Minê dîsa banzda.

Ax, xwezî ez rokê kulekê da biketama, tu jî bihatayî, te dest bavîta milê min, ez ji kulekê ra derxistama. Bextewar, ka tu wî çaxî li ku bûyî, qe nizanim!..

Riataza

Berfa Pampê…

Derheqa nivîskar da

Qeydên dişibine hev

Share