LEHÎ Û ÇEM

LEHÎ Û ÇEM

La Fontaine

Lêanîn: Memê Miksî

 

Lehiyek ecêb û hir

Ji çiyê hat bi gurgur

Tiştek wiha ezamet

Kesekî nedîbû qet

Ji ber wan pêl û mewcan

Xilas nedibûn tu can

Ewê terr û hişk bi tev

Yekawir didane hev

Li hember nebû tu hêz

Bibite tikil û nêz

Gundî mîna mûriyan

Tev ji ber direviyan

Lê tenê kesek rêwî

Hin diz ketbûn li pey wî

Ca ku xilas be ji wan

Da avê wî bêguman

Bi hêstira şeş salî

Derbaz bû çû wî alî

Mêrik pê hesa hingav

Bes ji gurmegurm e av

Dengek bixof lê vala

Ketiye wan newala

Vê serketina bê şik

Zêde zirrav da mêrik

Rabû çû dîsa bi zû

Dizan jî da pey ji nû

Vêca piştî demekê

Hat bi rastê çemekê

Ev çem hêmin bû bêdeng

Ne gujguj bû ne aheng

Mêrik zen dikir wisan

Dê derbaz be bi hêsan

Xwe ji dizan kir xilas

Lê ne bişans bû ew qas

Çemî ew ber xwe birin

Fetisîn her du mirin

Belesebeb pêşiyan

Ev yek nekirin beyan:

“Xwe biparêze daim

Ji wî kesê milahim

“Ne ji ava xuşexuş

Dûr be ji ya mişemiş.”

Riataza

Derheqa nivîskar da

RIATAZA

Malpera nûçeyan derheqa kurdan û Kurdistanê da; Ji bo malûmatîyên zêde berê xwe bidine vê navnîşanê: [email protected]

Qeydên dişibine hev