Ji nimûneyên zargotina me – 284

Ji nimûneyên zargotina me – 284

Em weşandina berhemên ji nimûneyên zargotina me berdewam dikin. Berhema îro me ji pirtûka “KLAMÊD CMAETA KURDAYE LÎRÎKÎYÊ”, ku sala 1972an bi kurmancîya kîrîlî ya kurdên Sovyet va hatîye çapkirin, hildaye û me ew transkrîpeyî ser herfên kurdîya latînî ya îroyîn kirîye. Vê carê emê çend kilamên xweş raberî we bikin.

Berevkar û amadekarê vê pirtûkê Hecîyê Cindî ye.

Tîpguhêzîya hemû berhemên me yên zargotinê ji herfên kirîlî û latînîya kurdên Sovyet ser latînîya “Hawar”ê, ku di malpera me da çap dibin, Mîdîya Têmûr û Dîdara Têmûr dikin.

Berhem çawa di pirtûkê da çap bûne, em wisa raberî we dikin.

Amadekar: Têmûrê Xelîl

 

  1. DE WEYLO

 

De weylo, weylo, weylo!

Ezê nexweşim, devê min tele,

Xelq tena li min dixin, dibên:

“Weylo, êtîmo, nexweşîya te kule, derde, qotike, hale, baye, taye?”.

 

Minê go: “Wey gundî, cînarno,

Nexweşîya min ne kule,

Ne derde, ne hale,

Ne baye, ne taye,

Nexweşîya min rindan û bedewan

Mîna meriv ji mesîya,

Mesîyê gola Nazûkê,

Meriv avê serda bimiçiqîne,

Bimîne ser xîzga ziha”.

 

  1. DILÊ MIN PIRA VÊ TIFLÎSÊ

 

Dilê min pira vê Tiflîsê,

Serra vegirtine kevirê zagranîsê,

Heta bimirim, destê xwe dilê min xin,

Kula derdê lawikê Cercerîsê.

 

Baranekê barî di xadêda,

Lêyî kişîya gelîyê Cercerîsê, devî rêda,

Xadê mirazê mirazxaza hasil bike,

Mirazê min xelqê têlî delal nav doşekê qedîfeda.

 

Dilê min dilê gogerçînê,

Gogerçîn xeyîdîye, naçe ser hêlûnê,

Minê şerma koma biran û pizmama nekira,

Minê şera reş girêda, biçûma şînê.

 

Evîntîya min xelqê têlî delal usane,

Notla evîntîya Memo Zînê.

 

Derê mala bavê min axpîne,

Şalka kewa gozel çîtê siyarî Moskov biskê gulgulîne,

Evîntîya min xelqê têlî delal usane,

Notla evîntîya Leyl û Mecrûmê rû esmîne.

 

 

  1. HESENÎKO QURBA

 

Hesenîko qurba,

Te çima wa kir?

Dilê keçikê çiqa min sar kir,

De tu were, emê destê hev bigirin,

Herine cem qazîngê bi miftayê,

Heker pirsa Asa te ji te bikin,

Bêje: “Minê qelenê Asê parva daye”.

 

Hesenîko qurba!

Zozan nema me lê danî,

Kanî nema me av jê nanî.

Hesenîko qurba!

Baran barî, me jê av anî,

Teyê tase ava kanîyaye sar ji min xwestibû,

Baran barî, av şêlû bû,

Dilê min evdala xadê

Hin bi kul bû, hin keser bû.

 

Qomsîyê gundê me gelek bûn,

Sivê zû radibûn li ser xanîya, li ber derîya,

Divê: “Hesenîkî Asêra bû”.

 

Hesenîko qurba!

Herçî orta min û teda

Qomsîtîyê dikin,

De bira xêrê wayê canê xwe nevînin.

 

Hesenîko qurba,

Min Xirpo-Miro şandîye aşda,

De tu were îşev hetanî sivê

Ber paşla min evdala xadê razê.

 

Foto: Mûzexaneya Seyda Goyan

 

Riataza

Derheqa nivîskar da

Têmûrê Xelîl

Berpirsyarê malpera me, sêkrêtarê Komeleya Nivîskarên Kurd li Swed, endamê Yekîtîya Rojnamevanên bajarê Moskvayê, nivîskar û rojnamevan. Fakulta fîzîk-matêmatîkê a zanîngeheke Ermenîstanê temam kirîye.

Qeydên dişibine hev