Zembîlfiroş -1

Zembîlfiroş -1

Em weşandina berhemên ji nimûneyên zargotina me berdewam dikin. Berhema nodûheftan me ji pirtûka “Folklora kurmanca”, ku sala 1936an bi kurmancîya latînî ya kurdên Sovyet va hatîye çapkirin, hildaye û me ew transkrîpeyî ser herfên kurdîya latînî ya îroyîn kirîye. Vê carê emê beşa pêşin a varyantên destana Zembîlfiroş, ku di nav gel da bi kilamkî belav bûne, raberî we bikin. Beşa duduyan emê piştî heftêyekê raberî we bikin.

Berevkar û amadekarê vê pirtûkê Hecîyê Cindî û Emînê Evdal in. Berhem çawa di pirtûkê da çap bûne, em wisa raberî we dikin.

Tîpguhêzîya hemû berhemên me yên zargotinê ji herfên kirîlî û latînîya kurdên Sovyet ser latînîya “Hawar”ê, ku di malpera me da çap dibin, Mîdîya Têmûr û Dîdara Têmûr dikin.

Amadekar: Têmûrê Xelîl

 

Ji nimûneyên zargotina me – 99

 

ZEMBÎLFIROŞ

Hey dil were, hey dil were,

Hey dil were, carek bi coş,

Car bi cara şerbet bi noş,

Dil qinyatê Zembîlfiroş.

 

Zembîlfiroş, lawikê delal,

Hindik husinê Ûsiv li bal,

Ew çê dike selikê bi al,

Tîne ber dergeyê mîrê Duryal.

 

Zembîlfiroş selika tîne,

Banê kelê digerrîne,

Xatûn Perî jor divîne,

Eşq û movet dihebîne.

 

Carîke xwe dişîne,

“Ewî kurrî ji minra bîne”.

 

Ew xatûn dêmtelake,

Surra xwe li carîyê eşkela kir,

Go: “Ewî lawikî qelpê min xirav kir”.

 

Ji wê hatin sisê û çare,

Zembîlfiroş birine male,

Sêzde derî lê dadane,

Zembîlfiroş pê nizane.

 

Zembîlfiroş, lawikê beyazî,

Ê, tu bi tena taqî kirasî,

Tu ji destê min navî xilasî.

 

Zembîlfiroş got, go:

-Xatûnê, gerden bi morî,

Tu rave ji xewa hingorî,

Şixul navin kotek û zorî.

 

-Zembîlfiroş, lawikê beyanî,

Ez usa bêjim, tu pak bizanî,

Min tu boy nefsa canê xwe anî.

 

Zembîlfiroş go:

-Xatûnê, te kezî mereşilik,

Te dêm hîva nazik,

Kesî van şixula nekirye bi rik.

 

Xatûnek derda wê têye,

Ji ber sûret, hîvek hiltêye,

Memka sêva hurmêye,

Gerdenê bînka xweş têye.

 

Xatûnek derda dihate,

Memika qend û nevate,

Gerdenê av li heyate,

Go: -Zembîlfiroş bonka min hatîye.

 

Xatûnê go: -Zembîlfiroş,

Bes bike van gilîya,

Ezê bidime te memikê xubrîya,

Li tekim çekê cindîya,

Te derxim ji tarî, tengîya,

Şa bibe bi çev û birûya,

Guh mede sofî, sunîya.

 

Xatûnê ji xwera kir kare,

Sûreta gul jê dibare,

Li memika sêv, hinare,

Gerdenê, tu dibê bihare,

Şa bibe eşqa dilane,

Guh mede şêx û mellane.

 

Zembîlfiroş rabû banê kelê dikewgirî,

Gelo kî min xilaz bike ji vî agirî.

 

Yek movik lê nebû zirare,

Rabû lêxist çûbû male,

Jina wî jê kir pirs-pirsyare.

Go: -Qîzê, min kelek dît; mermer dîwar,

Xatûnek têda bû xêlî sipîçal,

Ez zore-zor xilaz bûm ji bal.

 

Got: Ûsivê Elî, 75 salî, ji gundê Şamîramê, li ser nehya Aştarakê.

 

Riataza

Derheqa nivîskar da

Têmûrê Xelîl

Berpirsyarê malpera me, sêkrêtarê Komeleya Nivîskarên Kurd li Swed, endamê Yekîtîya Rojnamevanên bajarê Moskvayê, nivîskar û rojnamevan. Fakulta fîzîk-matêmatîkê a zanîngeheke Ermenîstanê temam kirîye.

Qeydên dişibine hev