Pirsa we û bersîva me – 118

Pirsa we û bersîva me – 118

Xwendevanên delal, wek hûn dibînin malpera me beşa xwe a bi sernavê ”Pirsa we û bersîva me” bi serketî bi rê va dibe. Rêvebira wê beşê nivîskara malpera me Nura Şane ye. Hemû pirsên ku redaksyonê ra têne şandin, em ji Nura delal ra dişînin û ew an bi xwe, an jî bi alîkarîya redaksyona malpera me bersîva pirsên we bide.

Vê carê xwendevanekî me behsa gotineke pêşîyan dike, ku di pirtûka Xelîlê Çaçan ya bi sernavê Gotinên pêşîyan da xwendîye û ji me dixweze em bersîvê bidin, ka ew gotina pêşîyan tê çi maneyê.

Rêvebira vê beşa me Nura Şanê şêwra xwe bi berpirsyarê malperê ra kir û di encamê da ev bersîv derket:

 

Pirsa Diyarê Qasim û bersîva Nura Şane

 

Pirs: Min di pirtûka Gotinên pêşîyan ya Xelîlê Çaçan da gotineke pêşîyan dît: ”Çavbirçî çûm, zikbirçî vegerîyam”? Gelo ew tê çi maneyê, an jî ser çi hatîye gotin?

 

Bersîv: – Carekê rûvî diçe rastî rezê tirîyan tê, dinihêre ku dorê sûr kirine. Hîç firsenda wî tunebû, ku ji çeperê derbaz be, bikeve hundur. Li dora rez çû û hat. Nihêrî, wê quleke biçûk di sûrê da heye. Şa bû, kir ku bikevê, ji qulê derbaz be, lê ji bextê wî ra qul pir teng bû. Kir û ne kir, çare pê ne bû. Bihêle here, heyfa wî bi tirîyan dihat, temê wî dikişand. Neçe jî, hîç çare tunebû.

Rûvî metel ma, nizanibû çawa bike. Lê ew bi fen û fêl bû. Da aqilê xwe, sê rojan li ber derê qulê tî-birçî ma. Ji birçîbûnê bû wek darik-derzî. Roja çaran ew di qulê ra derbazî hundur bû. Usa xwar, ku ji berê zêdetir kok bû. Îcar jî xwest derkeve, lê hew dikaribû. Dîsa sê rojan birçî ma, carek din jar bû û roja çaran ancax jê derket. Li piş xwe va careke mayîn bi hesret li rezan mêze kir, hizingeke kûr rahişt û xwe bi xwe ra got:

-Ax baxo, ax baxo… Tu xweş baxî, tirîyê te jî xweş in, lê heyf, ku ez birçî ketime nava mov û termên te, birçî jî derketim… 

Ango, ev gotinan pêşin dixweze bêje, bi tiralîyê meriv têr nabe.

Riataza

Derheqa nivîskar da

Nura Şane

Nura Şane 2 zanîngeh temam kirine, yek a Zanyarîya Tundurustîyê, a din jî a Dadmendîyê, niha di nexweşxaneyeke biyanî da li Stembolê kar dike. Nivîsên wê bi taybetmendîyên naveroka xwe, bi zimanê kurmancî yê dewlemend va wê ji hemû nivîskarên kurd, xwesma nivîskarên jin, cuda dike û gelek kes dixwezin çav bidine wê.

Qeydên dişibine hev