Perwîn Çakar bi zimanê Kurdî operayê çêdike

Perwîn Çakar bi zimanê Kurdî operayê çêdike

“Ezê bi rêya operayê zimanê Kurdî û Kurdbûnê li hemû cîhanê bidim naskirin”

 

Hunermenda Kurd Perwîn Çakar, ji Dêrîka Çiyayê Mazî

ber bi Îtalyayê ve dest bi rêwîtiyekê kir û niha li hemû dinyayê

bi zimanê Kurdî operayê çêdike. Piştî çîroka Roboskiyê ku bi strana

Lo Şivano li hemû dinyayê gerand, niha jî dixwaze bi çîroka

Mem û Zimanê operaya Kurdî çêke û li hemû dinyayê derxe ser dikê.

 

Perwîn Çakar, mûzîkjen û hunermenda Kurd ya operayê, li Dêrîka Çiyayê Mazî ji dayik dibe. Ew ne Kurdistanê, li bakurê Tirkiyê, milê behra Reş li bajarokê Ereglîya bi ser Zonguldakê mezin dibe. Ji ber ku bavê wê mamoste bûye, ew ji wir derbasî Erzîngan, Erzirom û bi şûnde jî derbasî Bismila Diyarbekirê dibin. Di 20 saliya xwe de li Enqerê zankoyê dixwîne, beşa mûzîkê. Ew piştî dikeve ezmûna operayê û vê ezmûnê qezenç dike, menejerekî Îtalyanî dixwaze lê guhdarî bike. Ew jî qebûl dike û piştî wê rojê serdanpê jiyana wê diguhere û 11 salan li Îtalyayê operayê dike. Bi şûnde jî li gelek welatên Ewropa û cîhanê.

Hunermenda Kurd ya Operayê Perwîn Çakar dibêje: “Rojek menejerek Îtalî ya operayê hat. Min jî dixwest dengê xwe bidim naskirin. Ez çûm bal wî û pir ji dengê min hez kir. Got dengê te gelekî xweş e. Got sopranoyeke wek zêrîne. Got tu diwazî werî Îtalyayê? Min got temam ez dixwazim werim.”

Çakar, di destpêkê de li Mariya Kallas guhdarî dike û dixwaze bibe wek wê, yanî dengekî cihanî. Ji xwe ji ber ku li Tirkiyê derfet nabîne, berê xwe dabû Îtalyayê. Ew li ser dikê dibîne ku herkes bi zimanê xwe operayê dibêje; çi Îtalyan, Alman, Îngîliz, Îspanî û çi jî Polonyayî. Hingî biryarekê dide ku ew jî bi zimanê xwe, yanî bi zimanê Kurdî, operayê çêke.

Perwîn Çakar: “Ew ê bi Îtalyanî, Almanî, Îspanî û Polonyayî opera digotin di dawiya konsertê de bi zimanê xwe stran digotin. Min got; çima ez jî nakim. Bi Îtalyanî, Almanî Îngilîzî çênabe, ez dixwazim bi zimanê xwe jî çêbikim. Wisa têkiliya min bi operaya Kurdî re çêbû.”

Sala 2011an hunermenda sopranoyê Perwîn Çakar dest bi operaya Kurdî dike. Çîroka wê ya operaya Kurdî jî li ser bobelata Roboskiyê şîn dibe û bi strana Lo Şivano, operaya Kurdî û wê xewna reş û tarî ya Roboskiyan bi cîhanê, bi rêya teknîka operayê dide nasîn.

Perwîn Çakar: “2011an de bû. Ji bo Roboskî ez pir xemgîn bûm. Ez çûm ser youtubê û min got ez ê lêkolîna hûnermendên Kurd bikim. Û stranên Kurdî hela çawane? Li malê min Lo Şivano stra. Û min got zimanê me çiqasî xweş e û muzîka me çiqas xweş e, çima bikar neyînim?”

Hunermenda Kurd ya operayê Perwîn Çakar, di projeyeke xwe de digel pîyanîsta navdar ya Tirk Îklîm Tamkan û Erkan Tekinê hosteyê Dudukê ku li cîhanê jî navdar e û bi eslê xwe Ermenî ye kar dike. Di vê projeyê de sê netewe tên bal hev û îmzeyekê diavêjin xebateke cîhanî. Her du hûnermend jî dilsozê muzîka Kurdî ne û dibêjin heta ew hene çi ji destê wan bê, ew ê bikin, ji bo opera û muzîka Kurdî.

Piyanîsta Navdar ya Tirk Îklîm Tamkan  got: “Demek dirêje ku me dixwest digel Perwîn projeyekê çêkin. Xewneke me hebû li ser stranên gelêrî, lê bi hemû zimanan, ji xwe ew bi her zimanî operayê dibêje. Vê gavê jî wê bi hemû zimanan stranên gelêrî bibêje.”

Hosteyê Dudukê yê Cîhanî Ertan Tekîn jî diyar kir: “Li vê derê em ne bi tenê sê kes in 300 kes in. Kevneşopiyeke 5 hezar salî heye di vê xebatê de û rihê 40 milyon Kurdî jî di navê de ye. Ez ê heta dawiyê ji bo muzîka Kurdî û yên gerdunî mil bidim û li cem wan bim.”

Perwîn Çakar hunermenda Kurd ev 13 sal in ku li ser çiroka Mem û Zînê kar dike ku bi zimanê Kurdî derxe ser dika operayê. Ji bo vê yekê dest bi xebatên xwe kiriye, lê jê re sponsorekî bi hêz lazim e ku vê çîrokê karibe li hemû dinyayê bigerîne. Perwîn Çakar jin û muzîkjeneke dilxwaze ku bi rêya operayê dixwaze zimanê Kurdî û Kurdbûnê li hemû cîhanê bîne qonaxa cihê ku heq dike.

http://www.rupelanu.com/perwin-cakar-bi-zimane-kurdi-operaye-cedike-6361h.htm

 

Riataza

Derheqa nivîskar da

RIATAZA

Malpera nûçeyan derheqa kurdan û Kurdistanê da; Ji bo malûmatîyên zêde berê xwe bidine vê navnîşanê: info@riataza.com

Qeydên dişibine hev