Biyaniyên li trênekê – 4

Biyaniyên li trênekê – 4

Fermo, mêze bikin nivîskara Îngilîz çawa bi saya wergera

nivîskarê malpera me Welat Agirî bi kurdîyeke xweş diaxive.

Emê berhema nivîskarê bi tevayî di rûpelên xwe da çap bikin. Îro beşa wê a çaran bixwînin

 

Patricia Highsmith

Wergera ji îngilizî: Welat Agirî

Werger ji: Strangers on a train

 

Çaxa Gay xwe gîhand Metkalfê, bo hevdîtinê, ji Mîrîamê re telefûn kir. Piştî axaftinê, qirarê xwe girtin, li ber dibistana xwe a berê hatin cem hev. Roj rojeke germ bû. Mîrîamê fotêrekî spî dabû serê xwe û hatibû hevdîtina Gay. Rûyê wê li gorî berê qelewtir dixuya, xet û xêzikan xwe avêtibûn bin çavên wê.

”Merheba Gay”, Mîrîamê got û bo veşartina wan diranên xwe ên xaromaro zûzûka devê xwe girt. Xwûdanê di ser re avêtibû, lê aram dixuya.

”Merheba Mîrîam”, Gay got, ”tu çawayî, başî, serdanîna te kîngê ye ?”

”Di meha çile de ye”.

”Dêmek ev du meh e jinik hemile ye”, Gay di ber xwe de got,”Divê tu bi wî bikî ha, yanî bi mêrik?”

”Tu jî zanî”, wê got, ”ji bo zewacê hin çetinayî hene”.

”Çetinayên çi, keçê ?”

Serê wê di ber de, ku mirov digot qey haya wê ji Gay tune, cab da

”Ew bi jin û mal e”. Dû vê gotina Mîrîamê, Gay jê pirsî :

”Lê dîsa jî em dikarin ji hev cihêbin, ne wisa ?”

”Owen heya meha îlonê nikare jina xwe berde, yanî hêj çar meh wext û wede heye”.

”Lê em dikarin ji hev veqetin”.

”Na, hinekî moletê bide min, ez ê derkevim rêwitîyekê, çend meha ne li van dera me”.

”Çii, rêwîtiya çi?”

Mîrîamê bi devbiken, ”Diya te ji min re behsa karê te ê li Florîdayê kiribû”, got û serê xwe rakir, bi çavên beloq li Gay mêzand. ”Dixwazim bi te re werim û heta çileyê pêşî li cem te bimînim”.

”Nexêr, tu nikarî bi min re werî”.

”Wee tu min bi xwe re nabî hii!, îca qey ez nikarim bi xwe bikevim rê û werim”.

”Heke  tu tiştekî wisa bikî, ezê dest ji karê li Florîdayê berdim”.

”Na na! tu dev ji wî karî bernadî”, bi dengekî hişk got, ”tu jî zanî ew kar ji bo te gelek girîng e”.

Gay hêrs nebû, bêhna xwe fire kir, lewma xûy û xesletê Mîrîamê baş dîzanî; jinik jinikeke şerût û netebitî bû.

”Na Mîrîam, ez ê dev jê berdim”.

”Ê de tu zanî, dilê te çawa dixwaze wisa bike”.

Gay dixwest bi wê re xeber de û pirsgirêkê safî bike, ”De ka bêje Mîrîam, ji min re bêje tu çi dixwezî ?”

”De min xwestina xwe ji te re gotibû, ka ez ê êdî çi bêjim Gay”.

 

Riataza

Derheqa nivîskar da

Welat Agirî

Zanîngeha Uludagê (Bursa) da zanîst ( science) xwand. A niha mamostetiyê dike

Qeydên dişibine hev