Nameyên evînî – 107

Nameyên evînî – 107

Xwendevanên delal, em beşa xwe a bi navê “Nameyên evînî”, bi rêberîya nivîskara malpera me Nura Şane berdewam dikin.

 

Hûnê di nivîsên Nurayê da evîna ser asta bilind, paqij, wek ava çavkanîyan zelal hîs bikin, a here giring jî, bi zimanê dayîkê.


Belkî dijwarîya here mezin di vê beşê da ev be: -Emê çawa bikin ku evîna mezin û erf-edetên kal û bavan li hev bikin, bi hev ra bikemilin û rêya xwe a bextewarîyê bibînin?

 

Hêvîya me di çareserîya vê pirsê da ew e, ku evîna mezin herdem rast e, madem rast e, gerekê bi ser keve.

 

Em îro nameyên evînî çap dikin, ku ji Nura Şane a delal ra hatine şandin. Ew ne tenê bi pênûsê hatine nivîsar, lê bi dil, ruh û hîsan va jî.

 

¤¤¤

Serokê cîyê kar dikare kar ji destê min hilde, ez bê kar bimînim. Lome bi wî/ê nabe. Têrorîstek an neyarek dikarin gulleyekê berî min din, jîyana min li xwe helal bikin. Lome ji van jî nabe. Heval-hogir-mirovên hezkirî dikarin berê xwe ji min biguhêrin. Lome ji van jî nabe. Dikare nexweşîyek li bedena min peyda bide. Lome li qederê jî nayê kirin. Ezê di nav hemû rewşan da ji vê cihanê bar bikim, herim. Lê dema evîndara min ji dest min here, wê rojê ez zanim ku ez tuneme. Ezê loman ji evîndara xwe jî nekim. Ezê loman ji Xwedê bikim, bêjim: -Ez wê eşqa ku te ez anîme cihanê didime ber wê êşê, ku te evîndara min ji min bir, dibêjim: Xwezî te ez neanîma vê cihanê.

 

¤¤¤

Di kurdî da gelek zarav û devok hene. Ez û Nura xwe bêy ku wan zarav û devokan têra xwe hîn bibin, me jî li ser bingehê evîna xwe zaravekî kurdî yê nû çê kir. Ew bi gotinên evînî va pir dewlemend e. Em ser wî zimanî çend salan, rojê 14-15 sietan, heta 20 sietan jî xebitîn. Gelek gotinên wî zaravî niha di ferhengên kurdî da tunene. Zêde kurd jî tunene, ku zimanê me fêm bikin. Ew ne sûcê me ye. Ji bo zimanê me fêr bibin tenê aqilmendî, zanebûn, xebathezî, hewildan têrê nakin. Gerek evîndar bin jî. Evîndarî jî belkî têr neke. Gerekê wek min û Nura min evîndar bin.

 

Riataza

Derheqa nivîskar da

Nura Şane

Nura Şane 2 zanîngeh temam kirine, yek a Zanyarîya Tundurustîyê, a din jî a Dadmendîyê, niha di nexweşxaneyeke biyanî da li Stembolê kar dike. Nivîsên wê bi taybetmendîyên naveroka xwe, bi zimanê kurmancî yê dewlemend va wê ji hemû nivîskarên kurd, xwesma nivîskarên jin, cuda dike û gelek kes dixwezin çav bidine wê.

Qeydên dişibine hev