Beşek ji romana nivîskarê malpera me

Beşek ji romana nivîskarê malpera me

APORÎA

(Xurrifî)

 

H.Kovan Baqî

 

Oûyy, ev hestiyê kaçika min û kaçika vî hestiyê min çerre jan didin! Sûretê xurrifîyekî keloxî: Çermekî qermiçî lê rapêçayî, qermiçîneke daliqîyayî, weke gunnê nêrîyekî serjêkirî û li ber tavê dardekirî. Qirçînîyeke miqîm. Nalîneke misêwa. Qîrrrç lorîîî, qîrrriç hahîîî… Sewta tenik û ya stûr dinizilin nava hev; tevdengî, dijhevrengî û qevizînên detone zara guhê min diçirrîne – qîzanî bela bû û ji holê rabû. Tillîkên vîrtuêzekî xurrifî li ser têlên arpê dirreqisin, dipengizin. Na, ne vîrtuêz e, kullî ye, kullîyekî qorrimî, her du nigên paşîyê bawî. Niç, ne bawî, felcî. Oûff, hestiyê qaçika min strana milyonsalî ya gur dinihirîne, zara guhê min hezar caro diqetîne û bi sewta xwe’y dijgramatolojîk zikê hişê min dişewitîne: Qirrç qîrrç, qirrç qîrrç, qirrçqîrrç, qirrrrç.

 

Tu kes ê cebirandina hestiyê qaçika min nebîne.

 

Xwaaaaa, ma ne qet ez nebûme xwedîyê xwehekê, go bi xweziya wê bibim tûleyekî şil! Heger hebûya teqez bêhna xwezîya jinê wê ji min bihata. Xweha min ê ez maç bikirama û qet bêhna serma’w seqemê ji hilma min nedihat. Erê herê, bêhna xweha min ê ji min bihata û ez nola mirîyên însanîyetê nediqefilîm. Qefilîm di qefê de. Qefikeke biçûk î têr û qefilîneke mezin î birçî. Qefik, xefik e, min dixwe û ez birçîbûnê dixwim.

Liêê Dersetayê, wiaa Setayê, xwûşka min î di malzarokê’d bêhna xwezîya xwe daye min xurrifîyê hanê; hela virde wer, daxilî vî zemanî bib û careke din bi hêrsa milyonsalî ya jinê xwedî bik vî qorrimê hanê, go bîna şorbeya kelîyayî ya xweha wî ji hilma wî tê, bê, de were liêê! Na na, ne ev qorrimê go bêhna şorbeya kelîyayî ji hilma wî tiêê! Hê’w hiêê! Ev ê din, hih, ev ev, te dî ev ê go bêhna germ a hilma xweha wî ji hilma wî tê, haaîîêê!

Hiuufff!

Zanim, ew ê ji min re bêjin, “Bavê me Kabîlê ensest.” Feqet û na’kîn, j’ber’g bêhna xweha min ji hilma min tê, zarokên siberojê nikarin min mîna xwedayê xwe darizînin. Lê bes dîsa jî ez ê bihêlim go ji min re bêjin, “Ensest.” Lewra seba ez sûcê ensestîyê bikim, min ev betanê tazî li xwe rapêça û ji re’hîmê welidîm.

Erê, ev sûc sûcê min e û ez sûcdar im; lê yê ev sûcdar xuliqandîye kî ye?

 

Riataza

Derheqa nivîskar da

Hkovan Baki

Piştî xwendinê, karê wî yê sereke nivîskarî û weşangerî ye. Berpirsê weşanxaneya NA ye. Gelek pirtûkên wî yên edebî bi zimanê kurdî derketine.

Qeydên dişibine hev