Nameyên evînî – 120

Nameyên evînî – 120

Xwendevanên delal, em beşa xwe a bi navê “Nameyên evînî”, bi rêberîya nivîskara malpera me Nura Şane berdewam dikin.

 

Hûnê di nivîsên Nurayê da evîna ser asta bilind, paqij, wek ava çavkanîyan zelal hîs bikin, a here giring jî, bi zimanê dayîkê.


Belkî dijwarîya here mezin di vê beşê da ev be: -Emê çawa bikin ku evîna mezin û erf-edetên kal û bavan li hev bikin, bi hev ra bikemilin û rêya xwe a bextewarîyê bibînin?

 

Hêvîya me di çareserîya vê pirsê da ew e, ku evîna mezin herdem rast e, madem rast e, gerekê bi ser keve.

 

Em îro nameyên evînî çap dikin, ku ji Nura Şane a delal ra hatine şandin. Ew ne tenê bi pênûsê hatine nivîsar, lê bi dil, ruh û hîsan va jî.

 

¤¤¤

Tu jî zanî, ku te jîyana min ji bingehê va bi xweşî guhêrand. Hezkirina te ez dame paqijkirinê, ez bi rastî jî biaqiltir bûme, ciwantir bûme, her deqe bextewar im. Hîç nefikirîme û min bi xwe jî biryar nedaye ka çawa bersîva xwedîya vê bextewarîyê bidim. Dilê min û ruhê min bi hebûna te ewqas paqij û şa bûn, ku rê li ber hiş û mejûyên min girtin, ji wan ra gotin bêy me tu gavekê jî nekin, ne hîştin ez misqalekê jî nerastîyê ji ezîza xwe ra bêjim, êdî li ku ma ku derewan bikim. Weke ku dilê min û ruhê min ji min ra dibêjin hey tu nikarî ji bin deynê evîna ezîza xwe derêyî, bi kêmanî wisa bike, ku rêvebirê hiş û aqilê te ne tu bî, lê em bin. Û ez bi te ra tenê bi riya dil û ruhê xwe hereket dikim. Weke ku tiştek ji te veşêrim, ew bextewarî ji dest min diçe, weke ku her tişt ji te ra nebêjim, ezê nexweş kevim.

Ew tiştekî din e, ku ez hîsên xwe yên ji dil û ruh nikaribim bi zar û ziman bêjim û tu jê encamekî din derxî.

Ruhê min diêşe û ez ji rewşa xwe kêfxweş im. Ji ber ku bo te diêşe.

Min ev nivîs bi ruhê nexweş nivîsî, loma jî belkî min nikaribû daxweza dil û ruhê xwe saxlem binivîsîya.

Riataza

Derheqa nivîskar da

Nura Şane

Nura Şane 2 zanîngeh temam kirine, yek a Zanyarîya Tundurustîyê, a din jî a Dadmendîyê, niha di nexweşxaneyeke biyanî da li Stembolê kar dike. Nivîsên wê bi taybetmendîyên naveroka xwe, bi zimanê kurmancî yê dewlemend va wê ji hemû nivîskarên kurd, xwesma nivîskarên jin, cuda dike û gelek kes dixwezin çav bidine wê.

Qeydên dişibine hev