Helbestvanê soranînivîs yê gewre bi kurmancî “diaxive”

Helbestvanê soranînivîs yê gewre bi kurmancî “diaxive”

Meriv hema dixweze bawer bike, ku ji hemû miletên cihanê pirtir kurd medya civakî bi kardarî û kêrhatî bi kar tînin bona parastina edet û toreyên me, pêşxistina ziman-zarav-devokên me, lêkolîna dîroka gelê me, ji windabûnê xilazkirina nimûneyên zargotina me, ji bo… li ser koka xwe a qedîm û qewîn şîn bin û gul vedin…

Fermo, nimûneyeke bi îzbat ya gotinên min kurmancîkirina berhemên bi zaravê soranî ne.

 

Şêrko Bêkes 

Kurmancîkirin: Muhsîn Özdemîr 

 

Ku zarok bûm

Ku zarok bûm
Li cem diya xwe radizam
Her şevê min daxwazek jê dikir
Min digot, dayê! tê ji min re erebê bikirî?
Digot, serçavan, lê bi şertê ku rakevî
Min digot, dayê! tê min bibî parka herî mezin a dinyayê, hêlaneyê bikim?
Digot, çima ne, dilê min, serçavan
Lê bi şertê ku rakevî.
Şevekê min jê pirsî, dayê!
Heke mezin bibim,
Ez ê bigihêm daxwaza xwe?
Got, dilrihet be, tu yê bigihêyê, lê bi şertê ku rakevî.
Ewqasî raketim,
Heta ku mezin bûm û
Daxwaza min biçûk bû.
Sal ser re derbaz bûn
Dûh şevê diya min hat xewna min,
Got, kezeba min!
Niha jî şevan berî ku rakevî,
Daxwazên te, tên bîra te?
Min got, şevan ez narazêm!
Got, çima ez gorî!
Ma te daxwazeke din heye?
Min got, daxwaza min ew e ku tu li cem min bî
û
Wekî din tu daxwazên min tunene dayê can.
Got, başe, dilê min başe,
Îşev ez ê werim xewna te
Lê bi şertê ku rakevî, şîrînê min…

 

Heke bimrim 

Heke bimrim

Ji axê re bêjin:

Bila bedena kurdeke din di xwe de nehewîne

 

Ji avê re bêjin :

Bila lehiya rondikan

ber bi Kurdistanê ve neherikîne.

 

Ji bayê re bêjin:

Bila doqikên xwe

li dilê dayîkên Kurdistanê nede.

 

Ji rojê re bêjin:

Bila agirê xwe yê xezebdêr

ji serê Kurdistanê hilîne.

 

Ji şevê re bêjin:

Pencereya hêviyê

bi ser rûyê tu kurdî de negre.

 

Û ji Xwedê re bêjin:

Bila dakeve û

hema çend kêliyan be jî

Bibe kurd…

 

Vêga keçek welatê min e

 

Silaveke dûr û dirêj

Navê min por e

Welatê min serê jinekê ye

Ji sê aliyan ve dora min girtine

Bi hîcabê!

 

Çendîn sal e zindanî me

Ne tav dikare bê serdana min

Ne ba

Nahêle biçim derê û

Rê jî nade

Tu helbest an awazek

Werin cem min.

 

Lê êdî

Min bi dizî

Bi tiliyan re lihev kiriye

Îşev em ê zindana min bibrin

 

Ez ê azad bibim

Piştre jî em ê hîcabê

Bidin destê çeqmeqê

Li ser lûtkeyê herî bilind

Li ber çavê hemû şaşikên dinyayê

Bişewitîne!

 

Riataza

Derheqa nivîskar da

RIATAZA

Malpera nûçeyan derheqa kurdan û Kurdistanê da; Ji bo malûmatîyên zêde berê xwe bidine vê navnîşanê: info@riataza.com

Qeydên dişibine hev