HELWÊSTA XELET!

HELWÊSTA XELET!

Roşan Lezgîn

 

Li Tirkîyê kanaleka televîzyonê bi navê Tv-8 heye. Pirtir di warê muzîk, meharet û sporê de bernameyên misabeqeyî yên bi navên wekî “O Ses Türkiye”, “Yetenek Sizsiniz Türkiye” û “Survivor” çêdike. Xelkê ku ji nûçeyên reşbîn û nûçeyên propagandîst yên siyasî têr bûye, van bernameyan temaşe dike. Lewre li van salên dawîn ev kanal gelek populer e.

Kanal ji alîyê polîtîkaya weşanê, ji bilî kurdî û ermenî, ji bo ziman û kultur û nasnameya miletên din misamehekar û xweşbîn e. Lêbelê bitaybetî li hemberî kurdî bi hişkî tirkperest e.

Ev kanal di bernameyên xwe de helbet cih dide kesine kurd. Lê çawa?

Li Tirkîyê polîtîkaya giştî ev e: eger kurdek dev ji milîyeta xwe berdabe û bi hemî hêza xwe heta xwîna xwe ya dawîn ji dil û can di xizmeta tirkîtîyê de texsîr neke, pêşî lê vekirî ye. Dikare bibe serwezîr jî, dikare bibe serkomarê Tirkîyê jî.

Li Tirkîyê kurdên ku dev ji kurdîtîya xwe berdane û di warên hunerî yên mîna edebîyat, muzîk, sînema, tiyatro, zanist, perwerde hwd. de bi dil û can xizmeta pêşdeçûna kultura tirkan dikin; bitaybetî yên ku nirxên kurdan yên kulturî û hunerî vediguhêzin ser tirkî, yanî adapteyê tirkî dikin û dikin malê tirkan gelek meqbûl in, xisûsî têne teşwîqkirin. Yanî tirk gelek hez ji kurdên wisa dikin, her awa îmkan didin wan û bitaybetî wan derdixin pêş, ji bo kurdên din wekî rol-model pêşkêş dikin. Ev kanala televîzyonê jî van krîteran gelek hostayane tetbîq dike.

Di bernameya “Survivor” ya îsal de du heb kurd jî girtine nav xwe. Yek jê, xelkê Hekarya ye, navê wî Ersîn Korkut e. Merivê Yılmaz Erdoğanî ye ku tam li gorî dilê miletê tirk sînema û tiyatro çêdike. Yê din jî, ji Diyarbekira me ye, navê wî Yasîn Obuz e.

Ev kanal bernameya Survivorê li Komara Domînîkê ku li Başûrê DYA di nav Oqyanûsa Atlasê welatekî giravî ye de çêdike. Bername çend meh dewam dike lewre beşdar bêrîya malbata xwe dikin.

Wan rojan, bi minasebeta Roja Dayikan ya Cîhanî, vîdeoyên ku dayikên wan bi wan re diaxifin bi wan dan temaşekirin. Diya keçeka survivorê xelkê Çekya ye, di vîdeoyê de bi çekî diaxife. Lê diya Ersînê me yê kurd yê xelkê Culemêrgê gelek zorê li xwe dike û bi tirkî diaxife. Dibêje “Elloha ımonet ol, buşoriler diliyom, urqedeşle bırober…”

Îcar, hinek kurdên ku vî televîzyonî temaşe dikin, li ser torra înternetê gazincan dikin, dibêjin me li Çeneqaleyê û li filan û bêvan derê ji bo tirkan şer kir, lê kanala televîzyona tirkan rê dide jinika Çekî bi zimanê çekî biaxife lêbelê rê nade diya Ersînî ku bi kurdî biaxife.

Ez dibêjim ev kurd neheq in! Çima? Çimkî bi awayekî gelek vekirî kanal tirkperest e, li hemberî kurdan heta tu bibêjî nîjadperest e; girêdayîyê polîtîkaya miletê xwe û îdeolojîya resmî ya dewleta xwe ye. Eger cih nede kurdî tu heqê kesî lê nîne!

Lê divê gotina me ji Ersînî û diya wî re hebe. Eger diya Ersînî bizanîya xirûra neteweyî çi ye, yan jî mîsqalek hisîyata milî pê re hebûya û qîymet bidaya zimanê xwe û bigota “Lawo, ez kurd im, ez xelkê Culemêrgê me, yan ez bi kurdî diaxifin yan jî hîç naxafin!…” Hingê zêdeyê serê kanala tirkan bû ku ew tirkîya berwarkî pê bida gotin. Dîsa, dema ew vîdeo hatin nîşandan, eger Ersînî wekî mêran bigota “Çima dayika Çekî bi keça xwe ya tirk re bi çekî diaxife lê dayika min neşê bi kurdî bi min re biaxife? Madem hûn rê nadin zimanê min, cihê min li ber we nîne!…” Wê demê me dê bizanîya helwêsta kanalê li hemberî me çi ye.

Tirk cesareta xwe ya înkar û asîmîlekirin û tehqîrkirina kurdan ji vê rebenî û bêhelwêstîya kurdan digrin!…

 

P.S. Ji ber ku malpera me biryar kirîye xênji zimanê me (bi hemû zarav û devokan) tu nivîs, audio û video yên bi zimanekî din neweşîne, em bi destûra xudanê nivîsê linka videoya bi nivîsê ra çap bûye, li jêr datînin.

 

https://www.facebook.com/rlezgin/videos/2657083031170218/

 

Riataza

Derheqa nivîskar da

RIATAZA

Malpera nûçeyan derheqa kurdan û Kurdistanê da; Ji bo malûmatîyên zêde berê xwe bidine vê navnîşanê: info@riataza.com

Qeydên dişibine hev

Bersîvekê binivîse

Your email address will not be published. Required fields are marked *