Ji nimûneyên zargotina me – 212

Ji nimûneyên zargotina me – 212

Em weşandina berhemên ji nimûneyên zargotina me berdewam dikin. Berhema dusedûçaran me ji pirtûka “Folklora kurmancîyê”, ku sala 1957an bi kurmancîya kirîlî ya kurdên Sovyet va hatîye çapkirin, hildaye û me ew transkrîpeyî ser herfên kurdîya latînî ya îroyîn kirîye. Vê carê emê çend stiranên gelêrî raberî we bikin.

Berevkar û amadekarê vê pirtûkê Hecîyê Cindî ye.

Berhem çawa di pirtûkê da çap bûne, em wisa raberî we dikin.

Tîpguhêzîya kurdîya ji tîpên kirîlî ser tîpên kurdîya latînî Mîdîya Têmûr û Dîdara Têmûr kirine.

Amadekar: Têmûrê Xelîl

 

Taxa jorin

 

Taxa jorin taxa meye

Kewa gozel taxa jorin zibareye

De gava çevê min bi çevê keleş lawikê min nakeve

Min tirê gundê Heko xirabeye.

 

Derdê min

 

Derdê min, derdê te xanimê

Mîna şemamoka dayne ser taximê

Lawiko qurba, mala bavê te bibe zîyaret

Tu car, tu car berê xwe nadimê.

 

Qeme reşo

 

Qeme reşo, qeme berra

Te siviko, çaxê minra

Ber derê mala bavê minra neçe-neyê

Nezera dê û bavê min xirabe bejina tera.

 

Ez sêvim

 

Ez sêvim, sêva terim

Qerefîla panzdeh perim

Gava çevê min çevê gede lawikê min nakeve

Qudûmê çokê min tunene pê bigerim.

 

•••

Îro şeşe, sibê hefte

Ezê ser riya kavila Qersê bûme dar û texte

Gava çevê min bi çevê keleş lawikê min nakeve

Min tirê ne heft roje, salewexte.

 

•••

Kavilê gundê me gêlîda

Kerxana şewitî ser da sîda

Heyfa min qîzê, heyfa min bûkê

Destê te dewarê mêrê bîda.

 

•••

Te çevreşê, dil xişûşê

Zozan xweşe li deşta Mûşê

Ezê terka çev-birûyê belek nakim

Heyanî bikeve ber dara dergûşê.

 

•••

Navê hespa gede-lawikê min Tahire

Qevza qema wî karbare

De tu were min birevîne

Alîkî sûrtê min sêve, yek hinare.

 

•••

Gede lawiko, ji xebatê were razê

Serê xwe bide ser çokê min fêlbazê

Dilê min evdala Xwedê usa tenike

Nona tofilê ser pîvazê.

 

•••

Dilê min hêlîna teyrê lale

Cot xezala gale-gale

Dê û bavê min destê min girtin

Dane yekî kale.

 

•••

Gede lawikê min ji min xeyîdîye bavê, birê

Daye ser riya vê Îdirê

Kesekî xudanê xêrê tune

Vegerîne bîne ber sîya vê çadirê.

 

•••

Navê yara min Eyşane

Morî, mircan ji zenda zer qetîyane

Koka diranê min êşîyane

Ramûsaneke qîza kerê pir dermane.

 

•••

Em himberê hev rûniştin

Me keserê kûr dahiştin

Kevir helîyan, dar gihîştin.

 

•••

Germa Rewanê kîne-kîne

Ceh çinîne, genim şîne

Xwezila min wî evdî be

Gede lawikê xwe bi çevê xwe bibîne.

 

•••

Hevraze, bîna min dimîne

Berjêre bîna min diçikîne

Xwedê axêra nehêle, çawa nahêle lawikê min

Du roja mala xwe bimîne.

 

•••

Lawiko, ez bedewim nola hîvê

Kurê kerê, wekî min zanibûya tu evseneyî

Tu car yartî bi tera ne dikir

Seva dilketina meh û nîvê.

 

•••

Lawiko, çi evîntîya min û te kir

Kesî serê kesî ne kir

Wekî min zanibûya tu bêbextî

Tu car yartî bi tera ne dikir.

 

Got: Egîtê Hemîd, 30 salî, xwendî, ji gundê Pampê, li ser nehîya Aparanê.

 

Riataza

Derheqa nivîskar da

Têmûrê Xelîl

Berpirsyarê malpera me, sêkrêtarê Komeleya Nivîskarên Kurd li Swed, endamê Yekîtîya Rojnamevanên bajarê Moskvayê, nivîskar û rojnamevan. Fakulta fîzîk-matêmatîkê a zanîngeheke Ermenîstanê temam kirîye.

Qeydên dişibine hev