BANGA MELÊ Û XEYDA CIVATÊ

BANGA MELÊ Û XEYDA CIVATÊ

Zeynelabidîn Zinar, nivîskar/lêkolîner

 

Melayê mizgeftê hertim digot civata xwe:
– Navê Xwedê bi erebî ELLAH e, ne ALLAH e.

Lê civatê digot Melê:
– Ma tu dizanî yan dewlet dizane?

Rojekê Mele xwe bi xwe sêwirî û got:
. Divê ez tiştekî bikim ku ev kes têkevin nava pirsan û bigerin ta ku rastiya bilêvkirina navê Xwedê fêm bikin.

Melê ji bo banga Nîvro derkete ser banê mizgeftê û dev pê kir, got:
ELLA Û YEKBER, ELLA Û YEKBER…
ELLA Û XEŞBER, ELLAAA Û TEKBEEEEER…

Sofî Silqo digel çend kesên salxur, li berojkê binê zinarê li ber mizgeftê ne û xwe li ber tava payîzê germ dikin, ji nişka ve got:
. Zarûno, îro ev Melê me xirifiye…

Sofiyekî din pirsî, got:
. Çima, mam Silqo?

Sofî Silqo got:
. Lê tu nabînî ku Melê dibêje ELLA Û YEKBER?

Û li Melê guhdarî kirin. Melê her banga xwe domand û got:
EŞ HENDU EN NAÎLAHE HEW ELLA…
EŞ HENDU EN NAÎLAHE HEW ELLA…

Sofî Silqo berê xwe da aliyê mizgeftê û bi bez çû, zilamên dî jî li pey wî kaşerêz bûn.
Sofî Silqo bi pêplûkên nêrdewanê ve hilkişiya û çû Melê bi paş ve kişand, nehişt ku banga xwe kuta bike. Jê pirsî û got:
. Ma tu fehş bûyî ku tu Banga Şerîf şaş dixwînî? Ma Bilalê Hebeş gotiye YEKBER?

Melê got:
. Bila civat were, em herin nava mizgeftê, ez ê rastiya meselê bêjim te.

Mele, Sofî Silqo û zilamên li ber deriyê mizgeftê çûn hundir û Melê got:
. Sofî Silqo, ez her roj çend caran dibêjim we ku navê Xwedê ELLAH e. Lê hûn dibêjin ALLAH. Herweha ez dibêjim we, rastî ELLAH Û EKBER e, ne ALLA Û AKBAR e.
Binerin dema min got: ELLAH Û YEKBER, we fêm kir ku ez şaş dibêjin û hûn tev li dijê min derketin. Baş e, di şaşiyê de ferqa A û ya Y-yê ji hev tune. Şaşî şaşî ye, ha A be û ha Y be.
Navê Xwedê ELLAH e dema tu bêjî ALLAH şaş e û nivêja te jî betal e. Dema tu di nivêjê de bêjî ALLAH û AKBAR û dema ku tu bêjî MUHAMMED, nivêjên te betal dibin. Lewra rastî ELLAH û EKBER e û MUHEMMED e.
Hewqas sal in ku hûn tev nivêja betal dikin û hûn bi xwe nizanin.
Ez jî dikim nakim, hûn ji min bawer nakin. Ez ê jî ji niha û şûnde her bêjim ELLAH û YEKBER heta ku hûn navê Xwedê rast bîjin. Kengê we navê Xwedê bi rastî got, ez ê jî dev ji gotina YEKBERê berdim.

Sofî Silqo got:
. Seyda, wele me nexwendiye, lê me dîtiye nedîtiye, hikûmeta me, saziya diyanetê tevek dibêje: ALLAH û dibêje MUHAMMED.
Niha te em xistin navbera Xelîl û Celîl.
De ka em êdî nizanin, em ê ji kê bawer bikin!
Em ê ji te bawer bikin an ji dewletê?

Melê got:
. Sofî, Sofî Silqo! Te jî wek lawê yê zirnevan kir.

Sofî Silqo got:
. Seyda, lawê zirnevanî çi kiribû?

Melê got:
. Zemanekî zirnevanek hebû, heyata wî tev bi lêxistina zirneyê derbas bûbû. Wî kurê xwe jî fêrî zirnê dikir. Lawik rojekê dest ji zirnê berdaye û çûye medresê dest bi xwendinê kiriye. Dersdarê medreseyê pirtûka destpêka xwendinê daye lêwik û ders dayê.
Lawik êvarê dema çûye malê pirtûka xwe derxistiye û xwendiye. Bav jê pirsiye:
. Kuro, hey belqityo, ew çi ye bi destên te?

Lêwik gotiye:
. Bavo, pirtûka xwendinê ye.

Bav gotiye:
. La lawo, xwendin çi ye?

Lêwik gotiye:
. Meriv vê pirtûkê dixwîne û piştre gelek pirtûkên dî jî hene dixwîne, meriv bi wan zana dibe û şaşî û rastiyê ji hev cuda dike…

Zilamê zirnevan serê xwe hejandiye, kiriye niçeniç û xwe bi xwe gotiye:
. Kurê min, dev ji zirna zêr berdaye û çûye dev bi pitpitokê kiriye!

Melê jî gotiye Sofî Silqo:
. We jî dev ji rastiya navê Xwedê berdaye û we dev bi pitpitoka Kemalîzmê girtiye…

 

X X X

 

Hêvîdar im ku Xwedayê mezin kesî şaş neke, eger şaş kir jî bila fehş neke, eger fehş kir jî bila bi erdê ve kaş neke…
Çi kesê ku îbadet li gor fonetîka alfabeya tirkî bike, betal e.
Çi kesê ku xwendina Ayet û Hedîsan (tîpa elîfê bi A, ya ´eynê bi A, ya TTê, bi T û hwd) șaș bixwîne, ibadetên wî betal in.

 

Riataza

Derheqa nivîskar da

Zeynelabidin Zinar

Bav û kalên wî tev mela bûne û ders dane şagirdan. Ew bi xwe jî berhemê Medreseya Kurdî ye. Wî 11 sal Medrese, 3,5 sal Imam-Xetîm, çar sal lîse xwendiyte. Rêvebirê malpera www.pencinar.se e. Bi dehan pirtûkên folklorî çap kirine.

Qeydên dişibine hev