Ji nimûneyên zargotina me – 220

Ji nimûneyên zargotina me – 220

Em weşandina berhemên ji nimûneyên zargotina me berdewam dikin. Berhema dusedûpanzdeyan me ji pirtûka “Folklora kurmancîyê”, ku sala 1957an bi kurmancîya kirîlî ya kurdên Sovyet va hatîye çapkirin, hildaye û me ew transkrîpeyî ser herfên kurdîya latînî ya îroyîn kirîye. Vê carê emê çend stiranên bi sernavê tevayî ”KILAMÊD GOVENDÊ” raberî we bikin. Îro em beşa wê a çaran çap dikin.

Berevkar û amadekarê vê pirtûkê Hecîyê Cindî ye.

Berhem çawa di pirtûkê da çap bûne, em wisa raberî we dikin.

Tîpguhêzîya kurdîya ji tîpên kirîlî ser tîpên kurdîya latînî Mîdîya Têmûr û Dîdara Têmûr kirine.

Amadekar: Têmûrê Xelîl

 

Lo dilo yeman

 

Lo dilo yeman, yeman

Ha li me çûne sal û zeman

Xelq zewicî, hîvîya te mam.

Xortê me çûne, kalê me man

Ji papaxreşa kes tê neman.

 

Lo, lo dilo, dilkê karê

Agir ketîye koka darê

Dişewite kirasê yarê.

 

Lo dilo, lo, dilkê berxê

Agir ketîye koka merxê

Dişewite kirasê Zelxê.

 

Lo, lo dilo, dilkê mîyê

Agir ketîye koka bîyê

Dişewite kirasê Zerîyê.

 

Lo, lo dilo, virda, virda

Çi serdilka serê dilda

Min ramûsa, çiqayî gul da.

 

Lo, lo dilo, aranîyo

Çîçike berfa zozanîyo

Ha li ser sîngê zer danîyo.

 

Sînê

 

Sînê mala xwe bar kir

Sînê, Sînê, Sînemê

Berê koçê berwar kir

Sînê, Sînê, Sînemê.

 

Sînê mala xwe bar kir

Sînê, Sînê, Sînemê

Qesta warê xwey par kir

Sînê, Sînê, Sînemê.

 

Dostê mala xwe bar kir

Sînê, Sînê, Sînemê

Qesta warê xwey par kir

Sînê, Sînê, Sînemê.

 

Dest şûşt û kofî girêda

Sînê, Sînê, Sînemê

Berda şirikê guhara

Sînê, Sînê, Sînemê.

 

Sînê mala xwe bar kir

Qesta mabû şûna wara

Ha dikim Sînê ramûsim

Gune situyê hevala.

 

Her çuxê

 

Her çuxê, çuxê, çuxê min

Çuxê min ji pirça berdîra

Min çux da serê tîra

Çux tenge, nagire pêsîra.

 

Çuxê min ji pirça karika

Her çuxê, çuxê, çuxê min

Min çux daye ser darika

Çux tenge, nagire memika.

 

Her çuxê, çuxê, çuxê min.

 

Got: Werda Şemo, 100 salî, gundîya Pampê, nehîya Aparanê.

 

Meyrikê

 

Meyrikê, Meyremê

Li erdikê rûmenî.

 

Çolbî bi dare

Gur hatî xware

Çevî li kare.

 

Çolbî bi merxe

Li erdikê rûmenî

Meyrikê, Meyremê

Gur hatî bi çerxe

Çevî li berxe.

 

Çolbî bi dare

Meyrikê, Meyremê

Li erdikê rûmenî.

 

Çolbî bi bîye

Gur hatî hêdîye

Çevî li mîyêye.

 

Meyrikê, Meyremê

Erdikê rûmenî.

 

Got: Werda Şemo.

 

Ez çûm

 

Ez çûm – derî dadayî

Keçik, tu delala dilê min

Ez çûm – derî dadayî

Keçik, tu qudûmê çokê min.

 

Derî zerze venabe

Keçik, tu delala dilê min

Derîngo, der piçûko

Keçik, tu qudûmê çokê min.

 

Jê derket qelfek bûko

Keçik, tu delala dilê min

Derîngo, der mezine

Keçik, tu qudûmê çokê min.

 

Jê derket qelfek jino

Keçik, tu delala dilê min

Jê derket qelfek jine

Keçik, tu qudûmê çokê min.

 

Rûvî

 

Rûvî, rûvî, rindiko

Serê dêlê kinciko

Tevire, bêre, mere

Hilde here

Tevire, bêre, mere

Hilde were

Hergê nebû bîst û çare

Serê min tera hişke dare.

 

Mişk

 

Evî mişkî çi kir, çi kir

Evî mişkî genim qir kir

Şirîtê bînin mişk bigirin

Kêrê bînin mişk şerjêkin

Tevşoya bînin hûr-hûr bikin

Rûvîya dirêj para qirêj

Rûvîya rêxê para axê

Hestuyê pîla şandine Fîle

Hestuyê hêtê şandine Xwêtê.

 

Her  nayê

 

Har nayê, her nayê

Kuro, xewka min nayê.

 

Îşev şeva temûzê

Govend gerîya bin gûzê

Xew xweşe paşila qîzê.

 

Har nayê, her nayê

Kuro, xewka min nayê.

 

Îşev şeva sibetê

Govend gerîya bin tatê

Xew xweşe paşila Fatê.

 

Har nayê, her nayê

Kuro, xewka min nayê.

 

Îşev şeva havînê

Govend gerîya kadînê

Xew xweşe nav nivînê.

 

Har nayê, her nayê

Kuro, xewka min nayê.

 

Îşev şeva baharê

Govend gerîya bin darê

Xew xweşe paşila yarê.

 

Har nayê, her nayê

Kuro, xewka min nayê.

 

Wey, wey dîzê

 

Wey, wey dîzê, jerê dîzê.

Me şikestîye dîza sêvêre

Bira siyar bin hespê nêre

Wey, wey dîzê, jerê dîzê.

 

Cabê bibin nav Botika

Bira siyar bin boz-kindika

Wey, wey dîzê, jerê dîzê.

 

Me şikestîye dîza kiftane

Me dîz daye ser agirî

Ji nezerê çemil firî.

 

Her gulim

 

Her gulim, gulim, Gulîzer

Çing-çing çê dikim nexşê Mîrzo

Şev yeke, sitêr hezar.

 

Vî Erezî guşe-guşe

Ha li ber têye qale-qirşe

Şev yeke, sitêr hezar.

 

Memikê yarê sêvê tirşin

Çing-çing çê dikim nexşê Mîrzo

Şev yeke, sitêr hezar.

 

Vî Erezî hurme-hurme

Çing-çing çê dikim nexşê Mîrzo

Şev yeke, sitêr hezar.

 

Memikê kawê sêvê xurme

Çing-çing çê dikim nexşê Mîrzo

Şev yeke, sitêr hezar.

 

 

Mamer

 

Mamer, Mamer, Mamer

Hay Mamer, hay Mamer.

 

Hespê Mamerî boze

Pismamo, min xulam!

 

Gema sêrî pîroze

Hay Mamer, hay Mamer.

 

Meydanê radike toze

Pismamo, min xulam!

 

Hespê Mamer beşe

Hay Mamer, hay Mamer.

 

Gema sêrî bi nexşe

Pismamo, min xulam!

 

Hespê Mamer sore

Hay Mamer, hay Mamer.

 

Gema li serî more

Pismamo, min xulam!

 

Got: Rostemê Hesenîkê, 14 salî, gundîyê Pampê, nehîya Aparanê. 

Riataza

Derheqa nivîskar da

Neo

Qeydên dişibine hev