Zarokên xwe fêrî xwendin û nivîsandina kurdî bike!

Zarokên xwe fêrî xwendin û nivîsandina kurdî bike!

Remzî Kerîm

 

Tu dixwazî zarokên te, xwe li pişt nasnameyeka naylon veşêrin?

 

Zimanê dayîkê ji bo nasnameya zarokan û ji bo hestên xwebûn, ewlebûn û piştrastbûna ji xwe pir girîng e. Eger zarok ji zimanê dayîka xwe bên dûrxistin, yan pêşî li perwerdeya bi zimanê dayîka wan bê girtin, ew beşekî girîng yê nasnameya xwe winda dikin.

 

Tu dixwazî zarokên te ne xwe bin?

Tu dixwazî zarokên te ji xwe neewle bin?

Tu dixwazî zarokên te ji xwe şerm bikin?

 

Zimanê dayîkê bingehek e ji bo kapasîteya fêrbûna zanyarîyan. Zarok eger bi zimanê dayîka xwe li dibistanan perwerde bibin, asoyeka berfireh ji bo fêrbûna zanyarîyên li ser hemû dersên dibistanê bi dest dixin. 

Tu dixwazî zarokên te bi dek û dolab, derew û şekrokên xapînok fêrî zimanekî din bibin?

Tu dixwazî zarokên te bêjin gunehê dayîk û bavê min bû, em çi bikin? Wan em fêrî zimane me nekirin?

 

Zimanê dayîkê belkî girîngtirîn nîşaneya nasnameya kulturî ye: ji ber ku her zimanekî ku li ser vê dunyayê tê peyivîn, mîraseke kulturî ya wî zimanî ye. Hemû stran, çîrok, xweşbêj, destan û gotinên pêşîyan yên her zimanekî wek tûrikê kultura wî zimanî ne. Zimanê dayîkê bi vê taybetmendîya xwe, di avakirina şexsiyet û nasnameya civakî û kulturî ya axêverên wî zimanî de xwedî rola sereke ye.

 

Tu dixwazî hevîrê zarokên te bi hêvênê zimanekî din bê bistirîn?

 

Zimanê dayîkê zimanê pêşî ye ku merivek fêr dibe; ew ziman e yê ku form dide bîr û hestên me û bere bere jî ev form dibe beşek ji şexsiyeta me. Beşek ji nasnameya me. Zimanê dayîkê zimanê dil e, zimanê hest û hiş û gêwl û mîzaca mirovan e. Mîna Nelson Mandela gotiye: “Eger tu bi merivekî re bi zimanekî ku ew fam dike bipeyivî, mebesta te digihe serê wî. Eger tu bi wî merivî re bi zimanê dayîka wî bipeyivî, mebest xwe digihîne dilê wî” .

 

Tu dixwazî zarokên te ji te şerm bikin?

Tu dixwazî şexsiyet û nasnameya kulturî ya zarokên xwe bispêrî çeqel û beratexweran?

Tu dixwazî derîyê dilê zarokên te ji te û reh û rîşal û kokên te re girtî be?

 

Eger bersiva YEK ji van pirsan jî ”erê” be, tu dikarî zarokên xwe bispêrî çeqel û beratexweran. (Zarokên te jî mîna gelek temenmezinên îro, nezanîn û fêrnebûna zimanê xwe, nexwebûna xwe, wê bikin gunehê te û wê wekî wan temenmezinên îro, ji bo fêrnebûna kurdî, hezar bahane û hêcetan bidin pêş).

 

Eger bersiva HEMÛ pirsan ”na” be, bi zarokên xwe re bi kurdî bipeyive. Zarokên xwe fêrî xwendin û nivîsandina kurdî bike. Hezar rê hene.

 

Riataza

Derheqa nivîskar da

RIATAZA

Malpera nûçeyan derheqa kurdan û Kurdistanê da; Ji bo malûmatîyên zêde berê xwe bidine vê navnîşanê: info@riataza.com

Qeydên dişibine hev