Di dawiyê de, HDP bi ser ket

Di dawiyê de, HDP bi ser ket

Yên ku bi mîsyona asîmîlekirina tevgera siyasî ya kurd HDPyê bi rê ve dibin, ji hemû nirxên neteweyî, çînî û exlaqî dûr in.

Fuat Onen 

Pênc partiyên ji siyaseta tirk yên ku grûbên wan di meclisa Tirkiyeyê de hene, li dij Îsraîlê sekneke hevpar nîşan dan, derbarî şerê di navbera Îsraîl û Filistînê de daxwiyaniyeke hevpar belav kirin.

 

Di daxwiyaniyê de Dewleta Îsraîlê bi zimanekî dijwar tê şermezarkirin û bang li Mehkemeya Cezayê ya NeteweyênYekbûyî dike ku wezîfeya xwe bikin.

 

Ev meclisa tirk ku ev e sed sal e li Kurdistanê bi jenosîda domdar dagirkeriya xwe didomîne, Îsraîlê bi dagirkerî û bi jenosîdkariyê sûcdar dike.

 

Ev sûcdarkirin ne bawerker jî be lê tê fêmkirin. Ya ku nayê fêmkirin hebûna îmzaya HDPyê ya li ser vê belavokê ye.

 

HDP, ji alî van çar partiyên siyasî ve tê sûcdarkirin ku alîkariya terorê dike û mesafe naêxe navbera xwe û terorê. Digel vê hûn ji bo çi bi îmzaya hevpar li bal hev cî digirin?

 

Li gor we HDP ji Îsraîlê jî xerabtir ne ”rêxistineke teror”ê bû?

 

Nexwe, hewceyiya we bi îmzayê HDPyê hebû ji bo ku hûn li hember derve yekîtiya xwe nîşan bidin û hinek jî bawerkerî bidest bixin. Çawa be HDP nebêje jî ew ji derve ve wek ”partiyeke kurd” dixwiyê.

 

Heçî HDP ye, pê şanaz e ku wek partiyeke Tirkiyeyê hatiye hesibandin. Rêvebirên HDPyê pir dilşad in ku ji alî dewlet û partiyên wê yên siyasî ve hatine qebûlkirin ku ev dewlet bi alîgiriya wan partiyan ve li sê parçeyên Kurdistanê şerekî dagirî û dijwar dimeşînin.

 

Li gor min ew hay ji vê bêrûmetiyê jî nîn in. Yên ku bi mîsyona asîmîlekirina tevgera siyasî ya kurd HDPyê bi rê ve dibin, ji hemû nirxên neteweyî, çînî û exlaqî dûr in. Yên ku wek neteweyî, çînî û exlaqî ji rûmetê bêpar bin, dê çawa hay ji bêrûmetiyê bimînin.

 

Ez ji girseya HDPyê yên birûmet dipirsim: Hûn qet naêşin bi bihevrabûna dagirkerên Efrînê, Serêkanî û Girêsipiyê?

 

Desteka we ya ji bo HDPyê ne ji bo wê bû ku hûn li dij van hemûyan bûn?

 

Ji bo şermezarkirina Îsraîlê hevparîbûna bi dagirkeran re ji bo we ne şerm e, ne zilm e, gelo? 

Riataza

Derheqa nivîskar da

RIATAZA

Malpera nûçeyan derheqa kurdan û Kurdistanê da; Ji bo malûmatîyên zêde berê xwe bidine vê navnîşanê: [email protected]

Qeydên dişibine hev