Li ber dergehê Lalişê

Li ber dergehê Lalişê

Parastin û guhdana Kurdên Êzidî serketin û pêşketina Kurdistaniyan e

Konê Reş

Roja îro, di navbera gelan û olan de cudahî û berberî hin bi hin kêm dibe. Diyar e ku ew jî ji ber zanîn, giyanê birayetiyê û wekheviyê ye. Pêwîste em baş bi qedir, qîmet û bihayê vê pêşveçûnê zanibin, xebat û bizavê di ber pêşxistina civata xwe de bikin, da ku em serbilind û serfiraz di şaristaniyek pêşketî de bijîn. Nexasim di vî heyamî de ku civata mirovahiyê bi lez û bez ber bi şaristaniyê ve diçe. Bayê azadî, demokrasî û mafê mirovan li seranserî cîhanê belav dibe.

Û wiha baweriya me pir mezin e bi gelê me yê Êzidî ku wê zû ji vê kujtariya hovane rizgar bibin u wê careke din li reseniya xwe, li Şengala xwe vegerin. Careke din wê li dor Lalişa Nûranî kom bibin. Careke din çiyayê Şengalê, bi darên hejîran bixemilînin. Şengala şewitî, Şengala berxwedanê…

Pêwîst e îro em li xwe mikur bên, ku em kurdên misilman ji gelek rexan ve deyndarên birayên xwe kurdên Êzidî ne. Para me jî gelek caran di qirkirina vê ola me a dêrîn de hebû, ew jî ji encamên misilmantiya me. Tevî ku piraniya me, bi koka xwe li vê olê vedigerin.

Pêwîst e jî, ji niha û bi şûn de her yek ji me xelkên vê olê, bîrûbaweriyên wan biparêzin, Lalişa Nûranî û tev perestgeh û şûnwarên wan ji nû ve vejînin. Alîkariya navend û saziyên wan bikin û keç û xortên wan bi xwendin bidin. Belê, di baweriya min de xwedîlêderketin, parastin, guhdan û pêşxistina xelkên me kurdên Êzidî û ola wan a dêrîn serketin û pêşketina ji tev Kurdistaniyan re ye.

Wêne: Ez û Şêx Merwan li ber dergehê Laliş

Çavkanî: http://www.rupelanu.com/

Riataza

Derheqa nivîskar da

RIATAZA

Malpera nûçeyan derheqa kurdan û Kurdistanê da; Ji bo malûmatîyên zêde berê xwe bidine vê navnîşanê: [email protected]

Qeydên dişibine hev