Ji nimûneyên zargotina me – 268

Ji nimûneyên zargotina me – 268

Em weşandina berhemên ji nimûneyên zargotina me berdewam dikin. Berhema îro me ji pirtûka “KLAMÊD CMAETA KURDAYE LÎRÎKÎYÊ”, ku sala 1972an bi kurmancîya kîrîlî ya kurdên Sovyet va hatîye çapkirin, hildaye û me ew transkrîpeyî ser herfên kurdîya latînî ya îroyîn kirîye. Vê carê emê çend kilamên xweş raberî we bikin.

Berevkar û amadekarê vê pirtûkê Hecîyê Cindî ye.

Tîpguhêzîya hemû berhemên me yên zargotinê ji herfên kirîlî û latînîya kurdên Sovyet ser latînîya “Hawar”ê, ku di malpera me da çap dibin, Mîdîya Têmûr û Dîdara Têmûr dikin.

Berhem çawa di pirtûkê da çap bûne, em wisa raberî we dikin.

Amadekar: Têmûrê Xelîl

 

  1. TE ÇEVREŞÊ, BIRÛ ŞÛŞÊ

 

Te çevreşê, birû şûşê,

Zozan xweş bûn sewta Mûşê,

Ezê terka çev-birûyê belek,

Dêmê gulî, sûretê sor,

Zenda zer, sîngê kever nakim,

Heta dikevî ber dar-dergûşa qîzînê.

 

 

  1. ZERÎ DOMAMÊ

 

Zerî domamê, ewrê reş barane,

Ewrê sipî zivistane,

Ewrê reş biharê serê mîyane.

 

Pezê mala bavê keleş kawa min denane,

-Keçikê kulmalê, minê wî çaxî çiftê zer memikê te dîne.

 

-Kuro kulmalo, ya bêbextî serda hato,

Te wextê serê zer memikê min dîne,

Nav û nîşanê wan çîye, çi nîne?

 

Gede go:

-Ezê tera dibêjim bi zimane,

Serê wan sorin, kokê wan sipîne,

Notla sêvê Xirtizîne,

Notla hurmîyê Amet-Xelîfane.

 

Keçik divê:

-Kuro, kulmalo, korê Helebê zane

Sûretê minî sor çawane,

Serê çift zer memikê min ne usanin.

 

-Keçikê, kulmalê, wextê min çiftê zer memikê te zer dîbûn,

Serê teda fînoyê Tunis bû,

Qotike Terezmanî bû,

Destê teda gopalê zîvîn bû,

Lingê teda gîzmê reşe firengî bûn,

Pezê mala bavê te dena bû,

Mînga qere beşe serberanî ber bêrîyê revî bû,

Tu berra bezî bûyî,

Tu li erdê ketî,

Sêsid şêst û şeş bişkoşkê ber bedena te qetîya bûn,

Minê wî çaxî çiftê zer memikê te zer dîbû.

 

-Kuro, kulmalo, te wextê çiftê zer memikê mine zer dîbûn,

Şede-şûdê te kî, kî bûn?

 

-Keçê, kulmalê, wextê min çiftê zer memikê te zer dîbûn,

Neh hebe li wêderê hazire sekinîbûn:

Sê heve Celalî bûn,

Sê heve Rojkanî bûn,

Sisêye Sîpikî bûn.

 

-Kuro, kulmalo, hersêkê Celalî qaçaxê li çiyê bûn,

Hersêkê Rojkîye vireke-derewîn bûn,

Hersêkê Sîpikî razgone, cînarê bavê min bûn,

Usane te çiftê zer memikê min dîne.

 

-Keçê, kulmalê, tu zanî ez ki heme, kême?

Ez ki heme, Hesenê Silo, kurapê teme,

Par vî çaxî Helebê çûm,

Îsal bona xatirê çev-birûyê teyî belek ez li van derame.

 

-Hesen cano, kurapî,

Îro çar roje Hecî Batran hatîye mala apê te mêvanî,

Bi dostî jêra dikin merîfetê,

Hecî Batran wê sivê min bavêje mefêye,

Wê berê min bide Kara-Xwêye.

 

-Hesen cano, kurapo,

Serê min qurbana serê te be,

Kuştina mêra heye –

Bona namûsêye.

 

Riataza

Derheqa nivîskar da

Têmûrê Xelîl

Berpirsyarê malpera me, sêkrêtarê Komeleya Nivîskarên Kurd li Swed, endamê Yekîtîya Rojnamevanên bajarê Moskvayê, nivîskar û rojnamevan. Fakulta fîzîk-matêmatîkê a zanîngeheke Ermenîstanê temam kirîye.

Qeydên dişibine hev