RÛPELEKÎ JI DÎROKA ME YA BI ROMA REŞ RE

RÛPELEKÎ JI DÎROKA ME YA BI ROMA REŞ RE

ROJEKE REŞ Û TARÎ Û DILÊŞ…

Bayram Ayaz

Îro 97mîn salvegera kuştina sê rewşenbîrên me ye.

Roja îdam kirina Hecî Extî (Bavê Tujo yanî Av. Mehemed Efendî), Seyid Evdilqadir û Kemal Feyzî yê Bedlîsî li Amedê…

Cangoriyên bizava azadiya gelê Kurd û rizgariya welatê me Kurdistanê, cangoriyên doz û dawayeke rewa, cangoriyên doza miletekî bindest, doza me Kurdan.

Doza miletê ne azad,

Doza welatê bê dewlet…

Em we bi rêz û hurmet bibîrtînin.

Zilma li we kirin, hed û hesab jê re nebû,

We li ser sêpiyan daliqandin, şehîd kirin.

We heta nefesa xwe ya dawî

Bi egîdî û qehramanî, wekî şêr û pilingan

Berxwe da bi serbilindî.

We li dilê zalim û kujeran tirs û xof reşand

Li dawiya dawî bi mêranî û wêrekî

jîn û giyanê xwe di ber vê dozê de bexişand.

Nahşên we revandin,

Li cîhên nenas û nediyar

Di çalekî de ax bi ser we de kirin

Kêl û gorên we ji xelkê veşartin.

Hêj em li dûyê cîhê kêl û gorên we ne.

Wan hûn ji me revandin.

Lê wan nekarî bîr û hizrên we bi dawî bînin.

Wan laşê we ji me revand.

Lê we ji me ra,

Ji keç û kur û neviyên xwe re mîrasek

Li dû xwe hêla

Mîrasê doz û dawayeke rewa û nimûneya wêrekiyê

Daku neviyên we jî,

Bo Kurdî, Kurdbûnê û mayîna nav û neslê Kurd

Bo parastina axa Kurdistanê, mayîna şûn û warên Kurdî

Bi berdewamî têkoşin, berxwe bidin.

Heta xelkê me azad, welatê me rizgarbûyî.

Em bi mîrasê we yê miletperwer kurdewar,

Bi bîr û hizrên we yê welathez Kurdistanî

Şanaz û serbilind in.

Rih û hizrên we yê Kurd û Kurdistanî

Serçaviya bîr û hizr û hêz û qeweta me ye.

Hêviya me ji keç û xortan, ciwanan ew e ku

Ew jibîr nekin van egîd û mêrxasan

Û doza xwe ya rewa.

Bi xwendinê û bi zanînê

Bi xwedî lê derketina ziman, nasname û axê

Pêşde bidin dozê û bigihîn mafên hevbeş ên miletî.

Eger me da ser şopa van egîdan

Dê Kurdî û Kurdbûn bimîne heta û heta

Dê avadan bibe, şax û şên be KURDISTAN.

Dê rihê cangoriyên me şad bibe,

Bibe gul û kulîlk li welatê me KURDISTANÊ.

 

Riataza

Derheqa nivîskar da

RIATAZA

Malpera nûçeyan derheqa kurdan û Kurdistanê da; Ji bo malûmatîyên zêde berê xwe bidine vê navnîşanê: [email protected]

Qeydên dişibine hev