ŞENGAL… FERMANA 72an… 03 TEBAX 2014

ŞENGAL… FERMANA 72an… 03 TEBAX 2014

Zilm û komkujiyên werin jibîrkirin, tên dubarekirin

Bayram Ayaz

*

Îsal, 8. salvegera fermana 72. a Şengalê

bi keziyê keçika Êzdî li kevira Ciyayê Şengalê lefandî,

bi hovîtî û rûreşiya mezata dayik û xuşkên me keç û jinên Êzdî,

bi helbesta kekê Eskerê Boyîk, yê xwîn ji dilê wî diherike,

bi banga mamoste kekê Kemal Tolan,

bi hewar û loriya kelama Hesen Şerîf

lanet li kujer û qatil û rêxweşkiriyan dibarînim,

cangoriyên fermana 72. bi rêz û hurmet bibîrtînim, yad dikim.

*

Mirovê bi vê fermanê û bi van hovîtiyan ne êşe,

ne mirov e

tenê loda goşt û hestiyan e

bê hest e

bê eqil e

bê vicdan e.

Vêca…

Kurdê/a bi vê êşê ne êşe,

ne Kurd e,

ne Kurdistanî ye

bê şerm û pêxas e

dijminê miletê xwe

kîndarê welatê xwe

sîxur û peyayê dijminê xwe ye.

Ey xuşk û birayê Êzdî

Kurda Êzdî, Kurdê Êzdî…

Nabêjim Êzdiyê Kurd û Êzdiya Kurd

Jiber ku hemû Êzdî Kurdê resen in,

Lê Kurd hene bûne cihû,

bûne mesîhî, bûne musilman.

Ew Kurdê cihû, Kurdê mesîhî, Kurdê musilman in.

Lê Êzdî ji berê û berê ve Kurd in,

Zimanê wan Kurdî ye.

Zimanê kîtêba pîroz meshefê Kurdî ye

Dua û nifirê wan kurdî ye.

Ew bi Xweda re tenê dikarin bi Kurdî biaxivin

Zarezara xwe bi Kurdî digihînin

Xweda, Ezda û melekê Tawis.

Baweriya zimanê wê bi Kurdî ye

Baweriya Êzdiyatiyê ye

Êzdiyatî hêştiye zimanê Kurdî

Heta û heta bimîne, reseniya xwe biparêze.

Kî jiber baweriya Êzdiyatiyê

Dijminahiya Êzdiya bike

Bêje Êzdiyatî şîrk e, heram e

Kurdan pîs dike,

Eger Kurd vê bike

XWE BI XWE PÎS DIKE.

*

Kurdo xwe biparêze

Bi fêl û fitneyên dijminên xwe

Nexape!

Xuşk û birayên xwe Êzdî hemêz bike.

Xuşk û birayên xwe Yaresan, Ehlê Heq, Elewî hez bike.

Qet ti ferq û cudahî nexe

nav Kurdê cuhî, Kurdê mesihî, Kurdê musilman.

Bo baweriyên cuda rêz bigre

Baweriyê an ne bawer kirinê

neke egera hesudiyê, fesadiyê, dijîtiyê û dijminahiyê.

*

Eger dixwazî bibî milet

Eger dixwazî bibî xwedî “tac û dewlet”

Eger dixwazî bibî mirovhez, hevdemî û şorişger

Eger dixwazî bibî mînaka medeniyetê

Serê her tiştî ferq û cudahiyên xwe binase

Ji rengên cuda, qevda rengan bihone

Netewe pirreng e,

wekî rengên li siruştê welat,

wekî pişta eyşo fatê ku carna asîman dixemilîne.

Wisa emê bibin neteweke ji xwe razî û hevgirtî.

Ji me re ev divê…

*

Li dawî careka din

Di heştemîn salvegera fermana heftê û duyemîn de

Vedigerim mijara xuşk û birayên me yên Êzdî.

Bang û gazina xwe dubare dikim:

Fermanê, fermanan jibîrnekin,

Xuşk û birayên xwe Êzdî hemêz bikin.

*

Xweziyekî me ji xuşk û birayên me Êzdî jî heye

Demê dibihîsim

Êzdiyek dibêje, “Ez ne Kurd im”!

Dinya bi serê min re dirûxe.

Ma eger tu ne Kurd î,

Kurd kî ye?

Gotina Kurdê resen ji bo kî ye?

Ew zimanê meshefa reş, çi ye?

Ma tu dizanî û dikarî bi zimanekî din

Ji xwedayê erd û ezmanan xêr û xweşiyê bixwazî?

Hema ew qasî bes e!

Ji wan dilreşan re

Ên hesudiyê û fesadiyê li me direşînin

Û kîna xwe bi ser me re dirêjînin.

Ji we re çend gilî û galegal,

Cend gotinên dawî…

Ez Kurd im, em Kurd in

Êzdî Kurdê resen e, Kurdên resen in

Ma tu çawa goştî ji nûnikê radikî

Nûnikê ji goştî dikêşî?

Bes e, ji van xapandinan re!

Ev hemî leyistokên dijminan in

Ji bo nehêlin em bibin neteweyeke

nav xwe de aş û aram û ji xwe razî.

Ji bo em nebin dewlet û xwedî serwerî.

Ji hev xistin û bi hev xistin û pişaftin…

Yanî “bol ve yonet”a Tirkan

Kemberê Erebkirina Erebên samî

Qaşo mirovayetiya bi me Kurdan re ya Farisan

Hemî leyistik û siyaset û stratejî ne

Bo tunekirina Kurdan, nehêlana Kurdistan.

De vêca biryara xwe bide

Dixwazî bimînî Kurd,

Zimanê te bimîne Kurdî,

Welatê te Kurdistan?

Eger bersiv “Erê” ye

Careserî, hevdu hemêz kirin e.

Tenê rê, bi êşa hevdu êşîn e.

Ez bi êşa xuşk û birayên xwe Êzdî diêşim,

Êşa we êşa min e.

Namûsa we ya li mezata hovan, îfet û namûsa min e.

Keç û jina li ber firotinê

Xuşka min e, diya min e.

Wêne: Rebwar K Tahir

Riataza

Derheqa nivîskar da

RIATAZA

Malpera nûçeyan derheqa kurdan û Kurdistanê da; Ji bo malûmatîyên zêde berê xwe bidine vê navnîşanê: [email protected]

Qeydên dişibine hev